ҚТЖ және PSA Қазақстанның көлік-транзиттік әлеуетін дамыту бойынша өзара іс-қимылды күшейтеді

ҚТЖ және PSA Қазақстанның көлік-транзиттік әлеуетін дамыту жөніндегі стратегиялық әріптестікті жалғастырады, оның шеңберінде ТХКБ-ны дамыту үшін KPMC Ltd бірлескен кәсіпорны құрылды. Сондай-ақ, PSA тобының құрамына кіретін Global DTC Pte Ltd компаниясымен бірлесіп, тасымалдау құжаттарының жіксіз алмасуын қамтамасыз ететін және Қазақстанды халықаралық жүк жөнелтушілер үшін тартымды ететін цифрлық көлік дәлізі әзірленді.

Қол қойылған құжат ҚТЖ мен PSA өзара іс-қимылын кеңейтуге бағытталған. Тараптар Қытайда жұмыс істейтін екі компанияның да активтерінің синергиясы есебінен Қазақстан арқылы жүк транзитінің көлемін ұлғайту бойынша күш біріктіруге уағдаласты. Бүгінгі таңда ҚТЖ Қытайда Сиань қаласының құрғақ портында және Ляньюньган қаласының теңіз портында теміржол терминалдарымен жұмыс істейді. PSA компаниялар тобының активтеріне 6 порттағы теңіз терминалдары, 13 қаладағы теміржол терминалдары кіреді.  

Меморандум сондай-ақ "Алматы агломерациясындағы индустриялық және көлік хабы"жобасы шеңберінде Жетіген станциясындағы теміржол терминалын дамытуды көздейді. Жобаны іске асыру мүмкіндігін KPMC Ltd және G-trans Service қазақстандық көлік-логистикалық компаниясы зерттейді.

Қазақстан-Сингапур бизнес форумында сөйлеген сөзінде Мемлекет басшысы Қасым-Жомарт Тоқаев елдер арасындағы тығыз қарым-қатынасты атап өтіп, «Қазақстан темір жолы» компаниясы мен сингапурлық PSA International компаниясы арасындағы Транскаспий халықаралық көлік бағытының немесе «Орта дәліздің» әлеуетін пайдалануға бағытталған синергиялық серіктестікті мысалға келтірді.

– Аталған бағыт Еуразия кеңістігіндегі ынтымақтастықты мүлдем жаңа деңгейге шығара алады. Бұл – Орталық және Шығыс Азиядан Еуропаға шығатын ең төте әрі орнықты жол. Сингапур компаниялары мен қаржы институттары бұл саладағы бизнес пен инвестицияның мүмкіндіктерін зерттеп, айтарлықтай пайдаға кенеле алады деп санаймыз, – деді Қазақстан Президенті.