ҚТЖ қызметкерлері арасында корпоративтік олимпиадалар өтті

ҚТЖ-да еңбек қауіпсіздігі және еңбекті қорғау, сондай-ақ экология мамандары арасында корпоративтік олимпиадалар аяқталды.

Олимпиада кешенді кәсіби тапсырмаларды қамтыды және үш кезеңнен тұрды:

I кезең – тест сұрақтарына жауап беру;

II кезең — ситуациялық мәселелерді шешу;

III кезең - блиц-сауалнама.

Іс-шараның мақсаты - қауіпсіздік және экология саласындағы мамандықтардың беделін арттыру, кәсіби өсуді ынталандыру және еліміздің барлық өңірлерінен келген мамандар арасында тәжірибе алмасу.

Еңбек қорғау бойынша корпоративтік олимпиаданың жеңімпазы Арыс вагон пайдалану депосының өндірістік қауіпсіздік және экология секторының бастығы Әмір Жұмағали болды.

Екінші орынды Ақтөбе жүк тасымалы бөлімшесінің жетекші инженер-технологы Бақытнұр Ермекова иеленді.

Үшінші орынды "Қазтеміртранс" АҚ Қостанай филиалының өндірістік-техникалық секторының жетекші инженері Олеся Мирамова жеңіп алды.

Экология бойынша корпоративтік олимпиадада бірінші орынды Ақмола магистральдық желі бөлімшесінің еңбек қауіпсіздігі және еңбек қорғау, өнеркәсіптік қауіпсіздік және экология қызметінің жетекші инженері Лаура Жамшитова иеленді.

Екінші орынды "ӘТЖК" ЖШС Павлодар филиалының еңбек қауіпсіздігі және еңбекті қорғау жөніндегі маманы Қапар Рахымжанов иеленді.

Үшінші орында — Балқаш сигнализация және байланыс дистанциясының еңбек қауіпсіздігі және еңбекті қорғау, өнеркәсіптік қауіпсіздік және экология қызметінің жетекші инженері (экологы) Олжас Ерменбетов.

Сонымен қатар олимпиаданың жекелеген қатысушылары арнайы марапаттарға ие болды. ҚТЖ корпоративтік олимпиадалары мамандардың кәсіби құзыреттілігін дамыту және еңбек қорғау мен экология саласында үздік тәжірибелерді енгізу бойынша маңызды іс-шараға айналды.