Главная Новости ҚТЖ магистральдық желіні салу мен жаңғыртудың ауқымды бағдарламасын жүзеге асыруда

13 ноября 2025, 16:48 197

ҚТЖ магистральдық желіні салу мен жаңғыртудың ауқымды бағдарламасын жүзеге асыруда

"Burabay Express" электр пойызында "Қазақстан темір жолы "ҰК" АҚ құрылыс жөніндегі басқарушы директоры Марат Есқалиевпен медиа-кездесу өтті. Сапар барысында ҚТЖ инфрақұрылымдық жобаларын іске асыру және вокзалдарды жаңғырту жөніндегі бағдарлама мәселелері талқыланды.

Спикер 2020 жылға қарай магистральдық желінің тозуы 57% -ға жеткенін, ал вокзалдар мен инфрақұрылым нысандары қанағаттанарлықсыз жағдайда болғанын атап өтті. Бүгінде "Қазақстан темір жолы "ҰК" АҚ елеулі ресурстарды жаңа темір жолдарды қалпына келтіруге, жаңғыртуға және салуға бағыттап отыр.

Мемлекет басшысының тапсырмасы бойынша 2029 жылға дейінгі магистральдық темір жол желісін дамыту жөніндегі бағдарлама іске асырылуда, ол 5 мың шақырым темір жол салу мен жаңғыртуды, сондай-ақ 11 мың шақырым қолданыстағы желілерді жөндеуді көздейді. Жұмыстар кесте бойынша жүргізілуде.

"Тәуелсіздік жылдары 2024 жылға дейін елімізде 2,5 мың шақырымға жуық жаңа темір жол салынды. Ал алдағы үш-төрт жылда одан екі есе көп салу және жаңғырту жоспарланып отыр", - деп атап өтті Марат Есқалиев.

Ең ірі жобалардың бірі - ұзындығы 836 км Достық-Мойынты учаскесінде екінші жолдардың құрылысы болып табылады. Жұмыстар нормативтік мерзімнен екі жыл бұрын аяқталады. 30 қыркүйекте Достықтан Мойынтаға дейінгі екінші жолдағы жұмыс қозғалысы ресми түрде іске қосылды.

Жоба аясында 380-тен астам инженерлік құрылыс, соның ішінде 92 көпір, 261 су өткізу құбыры, 28 автожол өтпесі және басқа да нысандар салынды. Жобаны іске асыру учаскенің өткізу қабілетін бес есеге ұлғайтуға мүмкіндік береді және ҚХР-дан және кері қарай жүк транзиті үшін қосымша мүмкіндіктер ашады. Пайдалануға берілген алғашқы айда жаңа жол бойынша 647 жүк және 235 контейнерлік пойыз өтті.

Жоба Қытай-Еуропа бағытындағы Қазақстанның рөлін күшейте отырып, Трансқазақстан темір жол дәлізін қалыптастырудың бірінші буыны болды. Ағымдағы жылы Жетіген-Қазыбек бек жаңа айналма темір жол желісінде жұмыс қозғалысын іске қосу жоспарланған, ол Алматы темір жол торабының жүктемесін 40% -ға жеңілдетуге және жүктерді жеткізу уақытын 24 сағатқа дейін қысқартуға мүмкіндік береді. Құрылысқа отандық кәсіпорындар мен мердігерлік ұйымдар тартылған.

Түркістан облысында Дарбаза-Мақтаарал желісінің құрылысы жалғасуда, ол оңтүстік аудандардың Қазақстанның негізгі желісімен тікелей теміржол қатынасын қамтамасыз етеді және Ресей мен Қытайдан Орталық Азия елдеріне транзиттік ағындарды қайта бөлуге, сондай-ақ Сарыағаш станциясының жүктемесін жеңілдетуге мүмкіндік береді. Жоба құрылыс кезеңінде 3 400 уақытша, ал 2026 жылы пайдалануға берілгеннен кейін 500 тұрақты жұмыс орнын құрады.

Сондай-ақ, Қытаймен үшінші теміржол өткелін ашатын Бақты-Аягөз (297 км) желісінің құрылысы да жалғасуда. Жобаны іске асыру Қазақстанның көлік жүйесінің бәсекеге қабілеттілігін арттырады, жүктерді жеткізу қашықтығын солтүстік өңірлер мен Ресейге дейін 320 шақырымға қысқартады, сондай-ақ облыстың дамуына қосымша серпін береді. Пайдалануға берілгеннен кейін 1200 адам тұрақты жұмыспен қамтамасыз етіледі.

Мойынты-Қызылжар (323 км) желісінің құрылысы ағымдағы жылдың мамыр айында басталды. Жоба маршруттың ұзақтығын 149 шақырымға қысқартуға, Мойынты-Жарық учаскесінің жүктемесін жеңілдетуге және 30 жұп пойызға дейін қайта бағдарлауға мүмкіндік береді. Оны іске асыру Қарағанды және Ұлытау облыстары экономикасының дамуына оң әсерін тигізеді.

"ҚТЖ "ҰК" АҚ сондай-ақ, бүкіл ел бойынша 124 вокзалды қайта жаңартудың ауқымды бағдарламасын іске асыруда. 119 нысанда белсенді жұмыстар жүргізілуде, 80 вокзал бойынша жаңғыртуды 2025 жылы аяқтау міндеті тұр.

Жобалар облыс әкімдіктері ұсынған жергілікті мердігерлік ұйымдардың қатысуымен, Қазақстан Республикасы Үкіметінің және «Самұрық-Қазына» қорының бақылауымен орындалады. Магистральдық желіні дамыту жөніндегі бағдарламаны іске асыру Қазақстанның Азия мен Еуропа арасындағы транзиттік көпір ретіндегі ұстанымын нығайтады, мыңдаған жұмыс орындарын құрады, өңірлердің экономикалық өсуін қамтамасыз етеді және елдің көліктік тәуелсіздігін арттырады.