ҚТЖ: Өндірістік ғимараттар жаңарып жатыр

2023-2026 жылдарға арналған өндірістік ғимараттарға күрделі және ағымдық жөндеу жүргізу бағдарламалардың арқасында №2 өндірістік учаскесінің Шетпе табельдік станциясы, Маңғыстау станциясында дистанцияның әкімшілік ғимараты, №5 өндірістік учаскесінің Өзен табельдік станциясы жөндеуден өтіп, су жаңа көрініске енді. №10 бекет бойынша №1-3 өндірістік учаскесінің табельдік ғимараттарына ағымдағы жөндеу жасалды. Болашақ станциясында әлеуметтік мақсаттағы объектілер, яғни дүкен мен наубайхана жөндеуден өткізілді.  

– Маңғыстау жол дистанциясы жұмысшыларының санитарлық-тұрмыстық жағдайын жақсарту мақсатында ағымдағы жылы «Теміржолсу – Маңғыстау» ЖШС күшімен бірнеше нысанда жөндеу жүргізілді. Жоғарыда аталған бағдарлама шеңберінде дистанция бойынша сегіз объектіге жөндеу жоспарланған еді. Атап айтсақ, қазіргі уақытта №10 бекеттен үш табельдік ғимарат, сондай-ақ Өзен және Шетпеде де табельдік ғимараттар толық жөндеуден өткізілді. Дистанцияның әкімшілік ғимараты да көптен бері күрделі жөндеу көрмей, ескіріп тұрған еді. Өртке қарсы бұрыштың да талапқа сай болмауынан үнемі сөз естіп, айыппұл арқалайтынбыз. Қазір мекемеміз төбесінен бастап едені, терезе-есігіне дейін жаңарды. Су да өтпейді, өртке қарсы барлық талапқа сай. Болашақ станциясындағы дүкен мен наубайхана әлі күнге біздің баланста болатын. Енді жөндеуден кейін ауыл әкімдігінің меншігіне берілетін болады, – дейді Маңғыстау жол дистанциясының бас инженері Нұрлыбай Қисаев.

Шахида Жұман

Дереккөз: "Қазақстан теміржолшысы"