ҚТЖ пойыздары бейнекамералармен толықтай жабдықталады

"Жолаушылар тасымалы" АҚ пойыздарда жолдағы қауіпсіздікті, жайлылықты арттыруға және жедел әрекет етуге бағытталған заманауи бейнебақылау және бейнесараптау жүйелерін енгізеді. Қазіргі таңда пойыздарда орнатылған камералардың жалпы саны 4000-ға жетті. 

2025 жылдың соңына дейін Ұлттық тасымалдаушының барлық 112 бағыты бойынша жүретін пойыздары толықтай бейнекамералармен жабдықталатын болады. 

Бейне мұрағаттар ахуал орталығының экрандары арқылы қаралады. Онда мамандар видеодағы жағдайларды жедел саралап, талдап отырады.

Бейне жүйелер ықтимал қауіптерді уақтылы анықтауға, тәртіп бұзушылықтарды тіркеуге және жолаушыллар қалдырып кеткен заттарға ден қоюға мүмкіндік береді.

Орнатылған камералардың арқасында пойыздардағы құқық бұзушылықтар 2024 жылмен салыстырғанда 21% төмендеп, шағымдар 32% азайды және ұмытылған заттардың 91% иелеріне қайтарылды. Барлық жаңа жолаушылар вагондары интеграцияланған бейнебақылау жүйесімен жеткізілуде.