Қылқалам мен өнерді серік еткен ардагер

Қаражанбас ардагерлерінің әрқайсы маң даладағы мұнай өндіру процесіне араласып, алғашқы нысандардың бой көтергеніне куә болған жандар. Тарих қатпарында қалған әр оқиға мен өзгеріс олардың жадында күні кеше болғандай жаттаулы. Бүгінгі кейіпкер де өндірістің өрге басуына өз үлесін қосқан ардагерлердің бірі.

Светлана Кушнарева вахтадағы өткен күндерді сағынышпен еске алады. Оның Қаражанбастағы еңбек жолы 28 жыл бұрын құрылыс-жөндеу басқармасында басталған. Әр жылдары өндірістік бөлімшеде және қауіпсіздік техникасы бөлімінде жұмыс істеді. Қиын да қызықты шақты бастан өткерген ол кен орнындағы жаңа ірі нысандардың құрылысына атсалысқан жұмысшылар қатарында болды.

«Менің жастық шағым және өмірімдегі ең керемет сәттерім Қаражанбаспен тығыз байланысты. Біз көп нәрсеге куәгерміз: кен орнының алғашқы объектілерінің құрылысына қатыстық, өндірістің қалай дамығанын көрдік. Қазір жағдай әлдеқайда жақсы, мұнайшылар үшін барлық жағдай жасалған. Сондықтан жылдар бойғы еңбекті бағалап, қорғау керек», – дейді Светлана Кушнарева.

Кейіпкеріміз қазір уақытын бос өткізбей, шығармашылыққа арнайды. Светлана керемет картиналар салады. Сонымен қатар тастар мен теңіз қабыршақтарынан ерекше қолөнер бұйымдарын жасайды. Оның жұмысына барлығы тамсана қарайды, тіпті әріптестер арасында сұранысқа ие. Жас мамандарға бағыт-бағдар беріп, тәжірибесімен бөліскен Светлана жылдар өтсе де үлкен және тату отбасының бір мүшесі болып қала береді.