Қытайдан ұзынқұрамды пойыздар қабылдануда

Ұзынқұрамды тәжірибелік жүк пойызы алғаш рет Қытай Халық Республикасының Қорғас стансасынан Қазақстанның Алтынкөл стансасына жөнелтілді. Пойыз 70 шартты вагоннан тұрады деп хабарлайды "ҚТЖ" ҰК" АҚ баспасөз қызметі.

Ұзынқұрамды пойыздарды құру жүктерді жеткізу жылдамдығын, локомотив өнімділігін және пойыз салмағы көрсеткіштерін жақсартуға мүмкіндік береді. Аталған технология сондай-ақ кері бағытта да жүзеге асырылады. Сонымен қатар, Алтынкөл және Қорғас шекаралық стансалары арасында пойыздарды өткізу және тасымал көлемі артпақ.

2019 жылдың 9 айында аталған шекаралық өтпеден ҚР-дан ҚХР 390 мың тоннадан астам жүк тасымалданса, бұл 2018 жылдың сәйкес кезеңімен салыстырғанда 54% артық. Кері бағытта – 2,5 миллион тонна өтіп, өсім 56% құрады.

Жыл сайын контейнерлік пойыздар саны арта түсуде. Ағымдағы жылдың 9 айында 1076 пойыз қабылданды және өңделді, бұл өткен жылдың сәйкес кезеңінен 48% жоғары.

Алтынкөл стансасы арқылы контейнерлік құрамдар Өзбекстан, Иран, Ауғанстан, Әзірбайжан, Грузия және Еуропа елдеріне жөнелтілуде.