Лайық марапат: Ембі кәсіподағының еңбегі еленді

Қазақстан Республикасы Кәсіподақтары күніне орай Астана қаласында «Қазақстандық мұнай-газ салалық кәсіптік одағының» Салалық Кеңесінің кезекті VI мәжілісі өтті.

Онда 2022 жылдың 9 айындағы «Қазақмұнайгазкәсіподақ» ҚБ атқарған қызметінің есебі тыңдалды. Сонымен қатар, алдағы жылдарда атқарылатын жұмыстардың жоспары да талқыланып, кәсіподақ ұйымы жетекшілерінің ұсыныстары тыңдалды.

Кеңеске қатысушылар ұжымдағы еңбек дауларының алдын алу, кәсіподақтар қызметін жандандыру, сондай-ақ салалық кәсіподақ Жарғысына өзгерістер мен толықтырулар енгізу мәселесін талқылады.

Кәсіби мерекеге орай кәсіподақтағы белсенді жұмысы үшін жекелеген ұйым жетекшілері жоғары марапаттармен ұлығыланды. Табысты еңбектері үшін марапатталғандардың арасында ембіліктер де бар.

«Ембімұнайгаз» АҚ Кәсіподақ ұйымының жетекшісі Болат Нсанбаев ҚРКФ-нің «Кәсіподақтағы белсенді жұмысы үшін» медалімен, «Доссормұнайгаз» мұнай-газ өндіру басқармасы Кәсіподақ комитетінің төрағасы Самат Мұхамбетов ҚРКФ-ның Алғыс хатымен марапатталды.