Маңғыстауда аға ұрпақ марапатталды

Қаладағы әсем мейрамханалардың бірінде ұйымдастырылған мерекелік түскі асқа 500-ге жуық қоғам зейнеткерлері шақырылды, сондай ақ құрметті қонақтар қатарында ардагер-мұнайшылар мен алғашқы ашушылар да болды. Іс-шараны аша отырып, «Маңғыстаумұнайгаз» АҚ бас директоры Мұрат Мұстафаев, бұл кездесудің зор мағынаға ие екенін айтып, қатысып отырған ардагерлер мен зейнеткерлердің әрқайсысы үлкен алғыс пен зор құрметке лайық екенін атап өтті.

- Құрметті, ағалар мен апалар, биыл еліміздің мұнайшылары Қазақстан мұнайының 125 жылдығын тойлауда. Осы мерейлі мерекемен сіздерді де шын жүректен құттықтаймын! Өткенге көз жүгіртсек, отандық мұнай өнеркәсібінің тарихы – жеңістер мен жетістіктердің, мұнайшылардың ерен еңбегінің шежіресі, жанқиярлықпен еңбек етіп, отанымыздың гүлденуіне бар ғұмырын арнаған аға ұрпақтың ерлігі, өмір жолы екенін аңғарамыз. Өткенсіз бүгін де, болашақ та болмақ емес. Ұзақ та адал және жанқиярлық еңбектеріңіз үшін, біздің кәсіпорынның дамуына қосқан өзіндік үлестеріңіз үшін сіздерге ризашылығымыз шексіз, - деді Мұрат Мұстафаев.

Сондай-ақ, шақырылған қонақтарды Бас директордың бірінші орынбасары Вэнь Цзяцзюнь мырза да мерейлі мерекемен шын жүректен құттықтап, ізгі тілектерін білдірді. Өз кезегінде ардагер мұнайшымыз Сағын Ерқасұлы Қырымқұлов аға ұрпақ атынан «Маңғыстаумұнайгаз» АҚ Басқармасына жылы қабылдағаны үшін алғысын айтып, ақ тілектерін арнады.

Мерекелік шарада ән шырқалды, күй тартылды. Мұрат Өскінбаев атындағы Маңғыстау облыстық филармониясы әртістерінің өнерлері, тыңдаушылардың көңілінен шығып, үлкен қошеметке ие болды.