Маңғыстаумұнайгаз басшысы Жетібайдағы жұмыс барысымен танысты

«Жетібаймұнайгаз» өндірістік басқармасы мен цех басшыларымен болған жиында «Жетібаймұнайгаз» ӨБ бастығы Болат Сейтмағанбетов мұнай қорлары, ұңғымалардың жалпы қорының жай-күйі, мұнай өндіру және тапсыру жөніндегі деректерді айтып, кенорынның өндірістік және әлеуметтік-экономикалық көрсеткіштерімен таныстырды. Жиныға қатысушылар Жетібай кенорнының қазіргі жағдайы мен перспективасын, сондай-ақ түйткілді мәселелер мен оларды шешу жолдарын талқылады.

Мұрат Мұстафаев өз кезегінде «осындай үлкен ұжымды басқару – зор жауапкершілік» дей келе, компанияның одан әрі дамуы мен өркендеуі үшін барлық күш-жігері мен білімін жұмсайтынын айтты.

Бұдан әрі Бас директор Жетібай кенорнының МАӨЦ, «Clean Field Kazakhstan» ЖШС, МСМ-27 УСГ-1, ГДТжГШПЦ, БКНС-3 ҚҚҰЦ секілді бірқатар өндірістік нысандарын аралап, «Асар» кенорнындағы цехтар мен учаскелердің қызметімен танысты.

Аталған жиында Бас директордың орынбасарлары мен құрылымдық бөлім басшылары еңбекті қорғау және қауіпсіздік техникасы, геологиялық барлау, өндіріс, экономика және қаржы, кадрлық және әлеуметтік саясат саласындағы 2022 жылғы атқарылған жұмыстардың қорытындысы туралы айтып, 2023 жылға арналған жоспарларымен бөлісті. Мұнайшылар разрядтарды арттыру, зияндылығы үшін қосымша төлемдер, ЕСОТ, әлеуметтік инфрақұрылымды дамыту, жұмысқа орналастыру, вахталық жұмыс әдісі және тағы басқа мәселелерді қозғады.

Кездесу соңында Бас директор ұжым тарапынан туындаған барлық сұрақтар бақылауға алынатынын айтып, құрылымдық бөлім басшыларына бірқатар нақты тапсырмалар берді.