Машинист: «Керемет жылдарым кен орнында өтіп жатыр»

Ол 35 жыл бойы бойындағы бар білімін кен орнын дамытуға арнап келеді. Кейіпкеріміз жұмыс істейтін газ цехы өндірістік процестерде ерекше орын алады. Мұнда өз саласының білікті мамандары қажетті стандарттарға сай болу үшін ілеспе газды мұнайдан бөліп алады. Газ өндірудің тәуліктік көлемі 32 мың текше метрді құрайды.

«Газ – маңызды ресурстардың бірі. Ол Қаражанбас мұнайын өндіру кезінде МПГУ, СПГУ арқылы жер қабатына бу айдау процесінде қолданылады. Мен осы жауапты процестердің бір бөлігі болып, өз үлесімді қосып жүргеніме қуаныштымын. Кен орнында өмірімнің ең керемет жылдары өтіп жатыр. Мен Қаражанбаспен бірге қанатымды қатайтып, баға жетпес тәжірибе мен ұйымшыл ұжымның мүшесіне айналдым», – дейді Жанкелді Қалиев.

Жұмыста құрметті мұнайшы, үйде көп балалы әке. Ол өзінің әріптестері сияқты кәсіби білімінің, жауапкершілік сезімінің және үздік болуға деген ұмтылыс арқасында күрделі де маңызды салада Қаражанбастың дамуына әлі де үлес қоса бермек.