«Мектепке жол» акциясына теміржолшылар белсене атсалысып жатыр

Бұрын білім ошағының есігін ашатын бүлдіршінді мектепке жинау тек ата-ананың жұмысы болса, қазір бұл шара ұжымдық деңгейде атқарылатын болды. «Мектепке жол» республикалық акциясына теміржолшылар жылда белсене атсалысып, тек өз әріптестеріне ғана қол ұшын созып қоймай, аз қамтылған отбасыларға да көмектесіп келеді. Алғашқылардың қатарында Ажар Ерманова басқаратын Қызылорда магистральдық желі бөлімшесінің кәсіподақ ұйымы отыз балаға сыйлық әзірледі.  

«Жыл сайын әріптестеріміздің мектеп ке баратын балаларына қолдау ретінде берілетін әлеуметтік көмек биыл да жалғасуда. Кәсіподақ ұйымының атсалысуымен 30 балаға мектепке қажетті оқу құралдары толтырылған сумка дайындап, күні кеше бүлдіршіндерге табыс етіп қуанттық. Былтыр да 40 шақты балаға сыйлық жасаған болатынбыз», – деді Магистральдық желі бөлімшесі персоналмен жұмыс бөлімінің маманы Аида Каналиева.  

Қызылорда магистральдық желі бөлімшесінің бастығы Ибраким Басықараевтың қолдауымен және «Аманат» партиясының «Бақытты отбасы» жобасы аясында әлеуметтік көмекке мұқтаж отбасы балаларының тізімі жасақталып, акция тек бір кезеңмен тоқталмай, әрі қарай да жалғасын таппақ.