Мерекелік кеш мұнайшы қыздарға арналды

«Ембімұнайгаз» АҚ-ның 100 жылдығына орай шаралар легі «Мұнайшы қыз» клубының ұйымдастыруымен Құлсары қаласындағы «Кең Жылыой» мәдениет үйінде 8-наурыз – Халықаралық әйелдер күніне арналған мерекелік кешінен басталды.

Шараға компания басшылығы мен әр өндірістік құрылымдық бөлімшеден 200-ге тарта мұнайшы ару қатысты.

Салтанатты кеште «Ембімұнайгаз» АҚ Басқарма төрағасының экономика және қаржы жөніндегі орынбасары Рысты Тасмағамбетова, «Жылыоймұнайгаз» мұнай-газ өндіру басқармасының бастығының орынбасары Ерлан Қондыбаев,«Жылыоймұнайгаз» МГӨБ кәсіподақ ұйымының төрағасы Сырымбек Сәрсембаев жаны нәзік болғанымен, «қара алтынды» өндіруде жауапкершілікті абыроймен атқарып жүрген мұнайшы қыз-келіншектерді көктем мерекесімен құттықтады.

«Мұнайшы қыз» клубының жетекшісі Р.Тасмағамбетова мұнайшы әйелдердің Ұлы Отан соғысы жылдарындағы, сонымен қатар, тәуелсіз Қазақстанның қалыптасу кезеңіндегі қосқан үлестеріне ерекше тоқталып өтті. Бүгінде «Ембімұнайгаз» акционерлік қоғамында жалпы ұжымның 20 пайызға жуығы әйел адамдардың еншісінде.

Салтанатты шара барысында Ембі өндірісінің дамуына үлес қосқан бір топ мұнайшы қыз «Ембімұнайгаз» АҚ Басқарма төрағасының Алғыс хатымен және естелік сыйлықтарымен марапатталды.