«Мейірім» иелері балаға темір жол билетін онлайн рәсімдей алады

Ол үшін жолаушылар сайтта немесе мобильді қосымшада жол жүру күнін, пойыз бен вагон нөмірін және тарифті таңдағаннан кейін, «Дисконттық картаны пайдалану» опциясы батырмасын басып, өзіне және баласына жол жүру құжатын рәсімдеуі керек.

Естеріңізге сала кетейік, өткен жылдың маусым айынан бастап барлық мүгедек топтағы жолаушыларға ыңғайлы болу үшін BILET.RAILWAYS.KZ сайтында теміржол билеттерін әлеуметтік маңызы бар бағыттар бойынша онлайн рәсімдеу бойынша «Мейірім» онлайн қызметі енгізілді. Қазіргі таңда бұл қызметті 3,2 мыңнан астам адам пайдаланды. «Мейірім» картасын «Жолаушылар тасымалы» АҚ билет кассаларында рәсімдеп алғаннан кейін, билеттерді жеңілдікпен онлайн түрде сатып алуға болады.

Сайтта темір жол билеттерін ресімдеген кезде бір пайдаланушының бір есептік жазбаға тек 10-ға дейін бірегей жолаушыны рәсімдеуге құқығы бар екенін есте ұстаған жөн. Жолаушылардың көп санын рәсімдеу кезінде жолаушының есептік жазбасы бұғатталатын болады. Аталған шара 2019 жылдан бастап қолданылып келеді және темір жол билеттерін алыпсатарлармен күресу және темір жол билеттерін заңсыз қайта сату фактілерін болдырмау мақсатында жасалып отыр.

Ұлттық тасымалдаушы жолаушылардан вагонға отырғызу және жол жүру кезінде өзімен бірге жеке басын куәландыратын және мүгедектігін растайтын құжаттардың түпнұсқаларын алып жүруін сұрайды. 

Сондай-ақ, карантин режиміне байланысты жолаушылардан жол бойында және еліміздегі вокзал аумақтарында бетперде режимін сақтап жүрулерін сұраймыз.

Кәмелетке толмаған жолаушылар үшін темір жол билеттерін рәсімдеу жөніндегі анықтамалық ақпарат:

• Жолаушыларды, багажды, жүк-багажды және пошта жөнелтілімдерін темір жол көлігімен тасымалдау қағидаларына сәйкес (ҚР ИДМ-нің 30.04.2015 ж. № 545 бұйрығы) ересек жолаушымен тек 7 жасқа дейінгі бір бала ғана тегін жол жүруге құқылы.
• 7 жасқа дейінгі балаға жеке орынды рәсімдеу үшін жеңілдетілген (50% жеңілдік) жол жүру құжатын (билетін) сатып алу қажет. 
• 7 жасқа дейінгі екі және одан да көп баласы бар жолаушының жол жүруі кезінде әр балаға жеңілдетілген жол жүру құжаттарын (билеттерін) (50% жеңілдікпен) рәсімдеу қажет. 
• 7 жастан 15 жасқа дейінгі балалар үшін билет құнының 50% жеңілдікпен темір жол билеттері рәсімдеуге болады.
• 15 жастан асқан балалар үшін жол жүру құжаттары (билеттер) ересектер сияқты рәсімделеді.
• Билет кассасына және пойызға отырғызу кезінде жолаушыға баланың жасын растайтын құжаттың түпнұсқасын көрсету керек.
• Кәмелетке толмаған балалардың пойызбен ересек адамдардың еріп жүруінсіз жүруіне тыйым салынады.