Миялыдағы «Қамқорлық» оңалту орталығы нәтижелі жұмыс көрсетуде

Атырау облысы Қызылқоға ауданының Миялы ауылында тірек-қимыл жүйесі зақымданған адамдарға арналған «Қамқорлық» оңалту орталығы нәтижелі жұмыс істеуде. Еске сала кетсек, ол 2024 жылы ашылған болатын. Нысан құрылысын қаржыландыруға «Ембімұнайгаз» АҚ (ҚМГ-ның еншілес ұйымы) да өз үлесін қосты.

Орталықта инсульт, инфаркттен кейінгі және қимыл жүйелерінде туабітті ақаулары бар адамдар ем қабылдап, оңалтудан өтуде. «Қамқорлық» бір мезгілде 25 адамға дейін қабылдай алады. Олармен реабилитолог, массаж жасаушы және физиотерапия бойынша нұсқаушы жұмыс істейді. Әр науқастың сауықтыру шаралары жеке-жеке жасалады, яғни, оның патологиясы, жасы, жалпы жағдайы ескеріледі. Келушілердің физикалық белсенділігін қалпына келтіру үшін медицина мамандары 12 түрлі заманауи құрылғылардың көмегіне жүгінеді.

Қызылқоға ауданында қимыл белсенділігі бойынша мүгедектігі бар 92 адам есепте тұр. Олар 320 шақырым қашықтықта жатқан Атырау қаласына қатынау қиыншылығынан құтылған. Тұрғындар оңалту мекемесіне инватакси көмегімен қатынайды.

«Қамқорлық» оңалту орталығының директоры Асылбек Мұратовтың сөзіне қарағанда, мүмкіндігі шектеулі жандар үшін қолжетімді медициналық көмек — аса маңызды. Мұны ауыл тұрғындары да растайды.

— Осыдан 3 жыл бұрын мен екі рет инсульт алдым. Соның салдарынан сөйлей, жүре алмай қалдым. Ота жасалды. Орталыққа ашылған күнінен бастап, келіп жүрмін. Күнделікті жаттығу жасаудың арқасында жүре бастадым, сөйлеуім де біртіндеп қалпына келе бастады, — дейді Миялы ауылының тұрғыны Әділбек Ұзақбаев.

— Жол апатынан кейін омыртқама зақым келіп, жүре алмай қалдым. Алғашқы кезде Атыраудағы оңалту орталығына қатынап жүрдім, бірақ ол жақ өте ұзақ әрі тек 14 күнге бару тиімсіз болды. Былтыр желтоқсан айынан бастап «Қамқорлықта» ем ала бастадым, нәтижесі де көп күттірмеді, қалыпқа келе бастадым. Ерекше жандарға қолдау білдіріп жатқандарға алғыс айтамын, — дейді Миялы ауылының тұрғыны Бейбіт Тұрашев.

Айта кетсек, аймақтағы әлеуметтік-әріптестік жобаларына қатысу — «Ембімұнайгаз» АҚ-ның мұнайлы өңірдің тұрақты дамуын қамтамасыз ету және ауылды жерлерді қолдау бағыттарындағы стратегиясының маңызды бөлігі.