Мүгедектерге арнайы вагон шығаруды ұсынады

"Аймақтық инновациялық даму" тақырыбындағы тренингке 130 адам қатысуда.  Шараның мақсаты – жастардың білімін дамыту, бір-бірімен қарым-қатынас ұстап, жан-жақты болуға үйрету. Тренинг барысында сәтті қорғалған 15 жоба іріктеліп алынып, оның ішінде ерекше мүмкіндігімен таңқалдыра алған үш жоба ерекше аталды. Олар енді Астанада өтетін республикалық бәсекеде бақ сынамақ. 

"Бүгінгі тренингке өз қызметіме қатысты жоба алып келдім. Мүгедектерге арналған арнайы вагон шығаруды ұсынып отырмыз. Қазіргі пойыз құрамында мүгедек адамдарға арналған тек екі ғана орын бар. Біз ұсынған жоба мүшелері пойызға мүгедектерге арналған арнайы вагон қосуды сұрайды. Онда шамамен 10 орын болады деп жоспарладық. Вагон ішін мүмкіндігі шектеулі азаматтарға арналған жабдықтармен қамтамасыз ету және жеделсаты салуды ұсынып отырмыз. Әр палатада жуынатын бөлмелер және дәретхана болады. Бір вагонды жабдықтау құны шамамен 1,5 млн теңге болады деп жоспарлаймыз. Техниканың дамыған уақытында бұл мүмкіндігі шектеулі азаматтар үшін ерекше қамқорлық болмақ. Біз теміржол қызметін тұтынатын халықтың қажеттілігін толықтай өтей алуымыз керек", – дейді "Жолаушылар тасымалы" АҚ мекемесінің жас маманы Эльвира Әбдіғалиева.

Теміржолшы жастар арасында вагондардағы ақауды тез анықтауға болатын жоба ұсынғандар да бар.

"Мұндай жобаларға мен бірінші рет қатысып тұрған жоқпын. 2016 және 2017 жылдары да үздік жобаммен танылдым. 2016 жылы республикалық сында екінші орын алдым. Ал 2017 жылы  инновациялық тренингтің "Жақсы жоба" дипломы табысталды. Биылғы жылы да, міне, Астанаға барып, бақ сынау мәртебесіне ие болып жатырмын. Пойыз доңғалағын тексеру үшін өзі жанып-сөнетін шамдарға қатысты жобамды алып келіп отырмын. Мұнда пойыздың  жүріп бара жатқан жай-күйі, қызған-қызбағаны және ең бастысы қауіпсіздік белгілері көрініп тұрады және қызып кетпеуді бақылауда ұстайды. Бұл әрі вагондарда ақаудың жоқтығына жылдам көз жеткізуге мүмкіндік береді. Жоба құны бір жылға 2,5 млн теңге, он жылға 25 млн теңге болады деп отырмыз. Қазіргі қолданыста бұл жұмыстарға жылына 3,5 млн теңге кетіп жатыр. Біздің жоба қолдау тапса, экономикалық жағынан тиімді болады деп ойлаймын. Ғылыми жобалармен айналысқан маған қатты ұнайды. Осы жобаны қорғап келгеннен кейін тағы да ойда жүрген жұмыстармен айналыспақпын. Осындай жобаларды тек ел ішінде ғана емес, мемлекетаралық шараларда ұсынуды көздеп жүрмін", – дейді Ақтөбе магистральдық желі бөлімшесінің жетекші инженері Айзат Қожан.

Айзаттың темір жол саласында еңбек етіп жүргеніне 8 жылға жуықтаған. Шұбарқұдық станциясында еңбек жолын бастаған жас маман бүгінде жетекшілік қызметке қол жеткізген. Ғылыми жұмыспен айналысу – сүйікті ісі. 2017 жылы "Үздік рационализатор" төсбелгісімен марапатталған.   

Ардақ Саттарқызы