Мұнайшылар өзара тәжірибе алмасты

Ірі мұнай өндіруші кәсіпорындар бір-бірімен ынтымақтастықты нығайтып, үнемі тәжірибе алмасады. «Қаражанбасмұнай» АҚ әлеуметтік жұмыс департаментінің жұмысшылары Кәсіподақ мүшелерімен бірлесіп танысу мақсатында «Өзенмұнайгаз», «Қаламқас» және «Ембімұнайгаз» өндірістік басқармаларының объектілеріне барды. Бұрын тәжірибе алмасу процесі өндіріс бойынша жүзеге асырылса, қазір серіктестік әлеуметтік салада да дамып келеді.

Көршілес Өзен және Қаламқас кен орындары – Қаражанбастың бұрыннан келе жатқан сенімді серігі. Мұнай компанияларының жұмысшылары көптеген бұқаралық іс-шараларда бір-бірімен тығыз қарым-қатынаста болады. Жұмыс делегациясын қарсы алған ӨМГ Бас директоры Мақсат Ибағаров қонақтарға әлеуметтік және әкімшілік-шаруашылық бағыттарда іске асырылып жатқан жаңа жобалар туралы айтып берді. Ол қаражанбастықтарды көлікпен жабдықтау, асханалар мен медициналық пункттердің қызметімен таныстырды. Сонымен қатар, жұмыс тобы ӨМГ қолдауымен ашылған «Балақай» оңалту орталығында болып, әріптестерінің игі ісіне тәнті болды.

Қаламқаста өндірістік басқарма басшылығы әріптестерін вахталық кенттегі жағдаймен таныстырды. Олар да ҚБМ-дағы әлеуметтік нысандар құрылысы, жатақханалар мен өндірістік ғимараттарды жөндеу сияқты әртүрлі жобаларды сәтті жүзеге асыруда. Әріптестер жұмысшыларды тамақтандыру мәселелерін талқылап, материалдық-техникалық жабдықтауға қатысты пікір алмасты.

«Серіктестік қарым-қатынастарды нығайту және тәжірибе алмасу - барлық тараптар үшін маңызды міндет. Осылайша біз мұнайшылардың еңбек жағдайларын жақсартып, коммуникациялық жүйені одан әрі жандандырамыз. Болашақта біз оқу және бұқаралық іс-шараларды жиі өткізуді жоспарлап отырмыз», – деді ҚБМ әлеуметтік жұмыс департаментінің директоры Мәлік Меңдіғалиев.

Ембімен де достық және ынтымақтастық көпірі берік. Ғасырлық тарихы бар компанияда барлық жүйелердің жұмысы автоматтандырылған. Сондықтан қаражанбастықтар жұмыс процестерімен мұқият танысты. Мысалы, кен орны аумағында «Үздік маман» байқауына дайындалу және қатысу үшін арнайы база бар.

Жұмыс сапарының соңында әріптестер әлеуметтік саладағы ынтымақтастықты нығайту мақсатында бірқатар іс-шаралар ұйымдастыру туралы келісті, себебі бұл – барлық тараптар үшін өзара тиімді жол.