«Нұрлы жол» вокзалынан «Саламатты Қазақстан» медициналық пойызы жолға шықты

Ол жарты жылда 123 елді мекенді аралап, шалғай ауылдар мен аудандардың шамамен 90 мың тұрғынына тегін медициналық көмек көрсетеді. Сонымен қатар, құқықтық кеңестер беріледі.  

Дәрігер, медиатор және заңгер сияқты 36 маманнан тұратын топ барлық азаматтарға міндетті әлеуметтік медициналық сақтандыру жүйесіндегі тіркеуге қарамастан тегін көмек көрсетеді. Пойыз әр елді мекенде 1–2 күн аялдайды. Осы уақыт ішінде мамандар тұрғындарға кеңес беріп, диагностика жүргізеді, қажет болған жағдайда жеңіл ота жасайды. Жоба «Самұрық-Қазына» қоры және серіктестердің қолдауымен жүзеге асырылып жатыр.

2010 жылдан бері пойыз екі мыңға жуық станцияны аралап, 800 мыңға жуық адамға (былтыр — 104 мың адамға) медициналық көмек көрсетті. Олардың әр бесіншісі — бала. Медицинаны қолдау — «Самұрық-Қазына» тобының корпоративтік әлеуметтік жауапкершілік аясындағы басым бағыттарының бірі.

2024 жылы Астанада 250 орынға арналған Ұлттық шұғыл медицинаны үйлестіру орталығы ашылды. Сонымен қатар, Ұлттық травматология және ортопедия орталығына мыңдаған науқасты емдеуге қажетті 7 заманауи жабдықтар жиынтығы табысталды. Балаларды оңалту мәселесі де ерекше назарда.

Жалпы, «Самұрық-Қазына» тобы жыл сайын шамамен 700 мыңдай адамға көмек көрсетеді.