«Нұрлы жол» вокзалында жаңа сервис іске қосылды

Нақтырақ айтқанда, сервистік қызметтің сапасын арттыру мақсатында «Нұрлы жол» вокзал кешеніндегі А.Байтұрсынұлы көшесі жағынан салынған «Р1» жабық паркингке кірген кезде қосымша көмек алуға арналған қоңырау шалу түймешігінің қызметі іске қосылды. Вокзал кешеніндегі технологиялық процесті ұйымдастыру бөлімінің бастығы Ғалия Нүскееваның айтуынша, бұл жұмыс биыл вокзал қызметкерлері мен қаладағы мүмкіндігі шектеулі жандарға арналған қоғамдық ұйымдар өкілдерінің кездесуінде айтылған ұсыныстар негізінде қолға алынған.  

– Шақыру түймесі жолаушылар мен вокзал кешенінің қызметкерлері арасындағы екіжақты байланысты қамтамасыз етеді, яғни осы батырманы басу арқылы сіз қажетті қызметтеріңіз бойынша сұраныс жасай аласыз. Атап айтқанда, мүгедектер арбасын шақыру, автокөлік құралынан мүгедектер арбасына ауысуға көмек сұрау, пойыз вагонына отыруға жәрдемдесу және т.б. сұраныстар бойынша көмектер көрсетіледі. Әр жолаушыға құрметпен қарау – «Нұрлы жол» вокзал кешенінің басты ұстанымы, – дейді Ғ. Нүскеева.