Отандық зергерлерді ҚҚС төлеуден босату қажет пе?

Соңғы 3 жылда қазақстандық зергерлер «Тау-Кен Алтын» ЖШС-дана небәрі 36,5 кг тазартылған алтын сатып алды. Бұл ретте зергерлер үшін жыл сайынғы квота шамамен 10 есе көп. Заңнамаға сәйкес тазартылған алтынды сатып алуға басым құқық Ұлттық банкке тиесілі, бірақ зергерлік саланы дамыту мақсатында ҚР ИИДМ Ұлттық Банктің келісімімен отандық зергерлік компанияларға 300 кг мөлшерінде тазартылған алтынды сатуға квота бөледі.

Сарапшылардың айтуынша, қолданыстағы салық салу жүйесі, атап айтқанда, 2018 жылдан бастап тазартылған алтынды сатып алуға ҚҚС енгізу отандық зергерлік бұйымдар нарығын «көлеңкеден» шығаруға кедергі келтіреді, ал зергерлердің өздері ҚҚС қолдану олар үшін аффинаждық зауыттардан алтын сатып алуды тиімсіз етеді деп шағымданады.

Отандық зергерлік бұйымдарды өндірушілерді ҚҚС төлеуден босату мәселесін ҚР ИИДМ Индустриялық даму комитетінің өкілдері мен Сенат депутаттары «Тау-Кен Алтын» аффинаж зауытының аумағындағы көшпелі кеңесте талқылады.

«Тау-Кен Алтын» ЖШС қаржы директоры Бақытжан Мұқарамов кеңестен кейін: «Біз зергерлік бұйымдарды өндірушілерді қосылған құн салығынан босату «Тау-Кен Алтын» ЖШС-ның тазартылған металдарды өткізу көлемін ұлғайтуға мүмкіндік беріп, ҚР зергерлік бұйымдар нарығын және оның ашықтығын дамытуға ықпал етеді деп сенеміз», – деп атап өтті.