Памир тауын бағындырған маңғыстаулықтар

Әсем безендіріліп, түрлі түсті суреттермен көркемделген 288 беттік кітапты баспадан шығаруға «Маңғыстаумұнайгаз» АҚ әкімшілігі мен Кәсіподақ комитеті демеушілік көмек көрсетті. Жаңа кітаптың тұсаукесер рәсімі Маңғыстау облыстық әкімшілігінің «Қазақстандық жауынгер-интернационалистердің Ауғанстаннан шыққанына 35 жыл» атты мерекелік іс-шара жоспары бойынша 2024 жылдың 15 ақпанында М.Өскінбаев атындағы Маңғыстау облыстық филармониясы ғимаратында өтті.

Бұл кітапта қасіретті Ауған соғысының айрықша бір бөлігі, анығырақ айтқанда, 24.XII.1979 - 28.I.1980 жылдары Файзабадтық 860-шы Қызылтулы Псков дербес мотоатқыштар полкінің әскери тарихтағы теңдессіз «ПАМИР МАРШЫ» және сол тау жорығына қатысқан 25 маңғыстаулық жауынгер-интернационалист туралы жазылған. Жорық кезінде солдаттар Ош–Хорог-Файзабад бағыты бойынша, Памир тауы массивінің 2406–4655 метрлік қар жамылған 10 биік асулары арқылы аса қауіпті тау жолдарында дұшпан отрядтарымен соғыса отырып, 1136 шақырымдық жолды бронды машиналар колоннасымен жүріп өтіп, 36 күнде Ауғанстанның Файзабад қаласына жетті. Жауынгер-интернационалистердің ерлік істері мен қайсарлығы жазылған бұл кітап ел болашағы жастар мен Отан қорғаушы сарбаздарымызға үлгі боларлық, сондай-ақ Қазақстан әскери командованиясы үшін таулы аймақтарда ұрыс қимылдарын жүргізуге қажетті әскери тактикалық шығармалардың бірі. Ауған соғысының тарихын жадымыздан шығармауымыз қажет, себебі сол соғыстан сабақ алу, яғни оның басталу себебін, таулы аймақтардың физикалық-географиялық жағдайын, ұрыс жүргізу тәсілдерін, қару-жарақ түрлерін жетілдіруді, көршілес мемлекеттердің ұстанған саясатын, әсіресе соғыстың адамдарға әкелген үлкен қасіретін, сондай-ақ материалдық шығындарын зерделеу – стратегиямыздың жоғарғы мәртебеге ие болуына, бейбітшілік заманда қуатты ел болуымызға өзіндік септігін тигізеді.

Жазылу мақсаты айқын да терең осы кітапқа демеушілік жасаған «Маңғыстаумұнайгаз» АҚ ұжымына «Маңғыстау облыстық Ауған соғысы ардагерлері мен мүгедектері одағы» қоғамдық бірлестегі атынан алғыс хат табысталды. Қалың оқырманға қолжетімді болуы үшін кітаптың бір бөлігі Маңғыстау облысындағы кітапханаларға, мектептерге, мекемелерге, қоғамдық ұйымдарға және Қоғамымыздың мұнай кенорындарындағы кітапханаларға да тапсырылуда.