Павлодар мұнай-химия зауытында мұнай өңдеу тереңдігі 89,63%-ға жетті

Павлодар мұнай-химия зауытында 2023 жылы мұнай өңдеу тереңдігі 1,44%-ға өсіп, 89,63%-ды құрады. Шымкент мұнай өңдеу зауытында соңғы бір жылда өңдеу тереңдігі 2,09%-ға өсіп, 84,88%-ды көрсетті. Ең үлкен өсім Атырау мұнай өңдеу зауытында тіркелді, мұнда мұнай өңдеу тереңдігі 82,09%-ды құрап, 6,37%-ға өсті.

Мұнай өңдеу тереңдігі — бағалы мұнай өнімдерін өндіру көрсеткіші. Ол көбінесе мұнай өңдеу тиімділігінің көрсеткіші ретінде қолданылады және мұнай өңдеу кезіндегі мұнай өңдеу өнімдері көлемінің жалпы шикізат көлеміне қатынасынан есептеледі.

Мұнай өңдеу тереңдігі — мұнай өңдеу зауытының техникалық-экономикалық жетілу дәрежесінің іргелі көрсеткіші. 93-95% — іс жүзінде максималды қол жеткізуге болатын нәтиже, ал 50% — бұл мұнай өңдеуге жұмсалған шығынды өтеуді қамтамасыз ететін ең төменгі шек.