PwC Kazakhstan ESG-рейтингісі: «Самұрық-Қазына» компаниялар тобы үздіктер қатарында

Қордың бірнеше негізгі портфельдік компаниясы 2024 жылдың қорытынды есебін талдау нәтижелері бойынша PwC Kazakhstan дайындаған ESG-ақпаратты жариялау жөніндегі жыл сайынғы рейтингіде Үздік ондық қатарына енді.

Бірінші орында — «Самұрық-Энерго», екінші орында — «Қазақстан Темір Жолы». Төртінші орынды «ҚазМұнайГаз», бесінші орынды «Қазатомөнеркәсіп» еншілесе, «Қазақтелеком», «QazaqGaz» және «KEGOC» сәйкесінше алтыншы, жетінші және сегізінші орыннан көрінді.

Бұл қордың тұрақты даму мәселелері мен деректерді ашық жариялауға бағытталған жүйелі тәсілін көрсетеді.

«Тізімнің айтарлықтай бөлігін «Самұрық-Қазына» тобының портфельдік компаниялары құрайды, бұл қордың ESG-аспектілерін басқарудағы бірізді әрі жүйелі тәсілін айғақтайды. Яғни, 2032 жылға қарай ірі портфельдік компаниялардың ESG-рейтингі бойынша 70-перцентиліне енуін қамтамасыз ету жөніндегі қордың мақсатына сай келеді», — делінген «ESG-ақпаратты жариялау бойынша үздік 50 компания» есебінде.

PwC Kazakhstan рейтингісі - Қазақстан компанияларының экологиялық, әлеуметтік және басқарушылық қызметі (ESG) туралы деректердің ашықтығы мен сапасын бағалаудың тәуелсіз құралы. Жалпы іріктеуге Қазақстанда жұмыс істейтін 98 компания қатысты.