Конституцияға референдумда қабылданған өзгерістер күшіне енді

5 маусымда өткен референдумда Қазақстан Конституциясына мемлекет азаматтарының қолдап дауыс беруімен қабылданған өзгертулер күшіне енді. Конституцияға өзгертулер мен толықтырулар енгізу туралы заң "Казахстанская правда" басылымында бүгін, 8 маусымда жарияланды.

Дауыс беруге 7 985 769 адам (дауыс беру құқығы бар азаматтардың 68,05%-ы) қатысып, олардың 77,18 пайызы Конституцияға өзгерістер енгізуді қолдап дауыс берді.

Конституцияға енгізілген өзгерістердің негізгілері: 

• Қазақстан басқарудың суперпрезиденттік формасынан мықты парламентке ие президенттік формаға көшеді;
• президенттің туыстарына жоғары мемлекеттік қызметтерді атқаруға тыйым салынады;
• жер мен жер астындағы байлық халыққа тиесілі болады;
• қазақстандықтар өз бетінше Конституциялық сотқа жүгіне алады;
• Қазақстанда өлім жазасы болмайды;
• мәжілістің депутаттық корпусы аралас сайлау жүйесі бойынша қалыптасады;
• сенаттағы президенттік квота қысқарады, мәжілістегі ҚХА квотасы жойылады;
• мажоритарлық жүйе сайлаушылардың қалауы бойынша депутаттың өкілеттігін тоқтатуға мүмкіндік береді.