«Саламатты Қазақстан» пойызы Атырау атырабында қызмет көрсетіп жатыр

«Саламатты Қазақстан» пойызының бас дәрігері Айнұр Егінбаеваның айтуынша, пойыз өңірдегі алғашқы жұмыс күнін Ганюшкино станциясынан бастапты. Мұнда екі күннің ішінде мыңнан астам адам қаралып үлгерген. «Саламатты Қазақстан» пойызының мақсаты да осы еді, яғни шалғайдағы елді мекендер тұрғындарына арнайы мамандандырылған дәрігерлік қызмет көрсету. 2020-2021 жылдары пандемияға байланысты тоқтап қалған пойыз былтыр жұмысын қайта жандандырған болатын. Медициналық пойыз дәрігерлері шалғай станциядағы теміржолшылар ғана емес, жергілікті тұрғындарды да қолжетімді медициналық қызметпен қамтиды.  

– Жылжымалы құрамда сегіз вагонның төртеуі медициналық вагондар, яғни онда әр түрлі медициналық құралдар мен дәрігер-мамандар бөлмесі бар, мамандар демалатын екі купе вагоны, вагон-мейрамхана және техникалық вагон бар. 11 жолсерік, 2 күзетші, дизельші, сушы мамандар да бар. Купе-вагондарда кондиционер бар, сондай-ақ пойызда душ, кір жуатын машина, тоңазытқыш қойылып, дәрігерлердің жұмыс жасауы және демалуына барлық қолайлы жағдай жасалған, – дейді пойыз бастығы Дінмұрат Валиев.  

Жергілікті тұрғындар терапевт, кардиолог, хирург, лор, гинеколог, окулист, т.б. дәрігерлерге қаралып, зертхана мамандарынан кеңес алады. Сондай-ақ пойызда УЗИ-диагностика, рентгендиагностика және клинико-диагностикалық лаборатория жұмыс істейді. Мамандардың кабинеттері қазіргі заманғы медициналық жабдықтар және дәрі-дәрмектермен қамтамасыз етілген. Дәрігер-мамандар кіші амбулаториялық операциялар да жүргізеді. Биыл Әйелдер және отбасы ұлттық комиссиясы бастамасымен жоба құрамына қосылған психолог, медиатор және заңгер мамандары өңірде болған осы күнге дейін 560 адамға кеңес беріп үлгерген.  

– Медициналық бригадалар құрамында терапевт, педиатр, гинеколог, хирург, ЛОР, кардиолог, невропатолог, офтальмолог, уролог, онколог-маммолог сияқты мамандар жұмыс істейді. Таңғы 9-дан бастап кешкі 6-ға дейін тұрғындарды қабылдау жүргізіле бастады. Барлығы 18 дәрігер бар. Медициналық пойыз кабинеттер ретінде жабдықталған және диагностикалық тексеруге және алғашқы медициналық көмек көрсету үшін қажетті заманауи медициналық жабдықтармен: ЭКГ, УДЗ аппараты, эндоскопиялық жабдық, гематологиялық және биохимиялық анализатор, Мерлин ультрадыбыстық сканері, флюорограф, гастрофиброскоп және басқалармен жарақталған 4 вагоннан тұрады. Аққыстау станциясында түске дейін 300-дей адам келіп қаралды, – дейді бас дәрігер Айнұр Егінбаева.  

Қосұйым Мұқашев

Дереккөз: "Қазақстан теміржолы"