Самұрық-Қазына: "Жеті қадам" жобасы жалғасуда

Бағдарламаға қатысушы компаниялардың арасында «ҚТЖ» ҰК» АҚ өкілдері де бар. Модуль мақсаты – әр қатысушының ішкі әлеуетін ашу, көшбасшылықтың жеке құндылықтары мен бағдарларын анықтау, тиімді басшылықтың негізгі дағдыларын қалыптастыру.  

– Оқу барысында көшбасшы деген кім, көшбасшы болу үшін қандай қасиеттер қажет, қандай құралдарды пайдалану керектігі айтылды. Сонымен қатар көшбасшының рөлі туралы баяндалды. Негізі барлық компаниялар арасынан 2 мыңдай жас маман қатысып, челлендж бен форум нәтижесінен 50 адам іріктеліп, таңдалған. Бағдарлама 7 модульге бөлінген. Әр модульдің өзіндік тақырыбы бар. Бірінші оқу модулі 24-25 мамырда Өскеменде басталды. Жеке тану стратегиясы, табысты адамның үштік кешені, табысқа жетуге ынталандыру, жауапкершілік, мақсат қою, өзін өзі ақтау сынды тақырыптарда мазмұнды ақпараттар алдық. Практикалық жұмыстар орындап, топтық тапсырмалар жүзеге асырдық, – дейді компанияның Бас есептеу орталығы Достық станциясындағы Бірінші желілік қолдау бөлімшесі филиалының жетекші инженер-электроншысы Құттыбек Мергембаев.  

Жобаға сонымен қатар Әлеуметтік саясат департаментінің менеджері Жақсылық Молдақұлов, Қарағандыдан электровоз машинист Айжігіт Әбдіғалықов, Қандыағаш станциясының бекет кезекшісі Азамат Сарбас, Атырау станциясының пойыз құрастырушысы Жандос Алтыбай қатысып, білім алды. «Жеті қадам» бағдарламасы өз командаларын табысқа жетелейтін және мемлекетімізге пайда әкелетін жаңа көшбасшыларды дамыту жолындағы маңызды қадам болып саналады.  

Райхан Рахметова

Дереккөз: "Қазақстан теміржолшысы"