«Самұрық-Қазына» таланттарды марапаттады

«Самұрық-Қазына» АҚ басқарушы директоры Ғибрат Ауғанов қатысушыларға жылы лебізін білдіріп, алғыс хаттармен марапаттады.

«Шынымен де, нағыз дарын иелері бақ сынаған елеулі іс-шара болды деп ойлаймын. «Самұрық-Қазына» қоры қызметкерлерді, олардың  бастамаларын  қолдау мен көтермелеу мақсатында зор жобаларды жүзеге асыруда. Үш айға жуық созылған «Таланттар байқауы» еншілес кәсіпорындар мамандарының арасында сыйластықты арттырып, жаңа табысқа жетуге жол ашады деп сенемін», – деді Ғибрат Ауғанов.

«Самұрық-Қазына» АҚ 15 жылдығына орай ұйымдастырылған «Таланттар байқауында» Қордың портфельдік компанияларының қызметкерлері «Вокал», «Айтыс» және «Бейнелеу өнері» номинациялары бойынша бақ сынасты. Қатысушыларға арнайы тәлімгерлер қолдау білдіріп, әділқазылар алқасы баға берді. Байқауда жүзден жүйрік, мыңнан тұлпар шапқан жеңімпаздардың есімі бүгін кешке салтанатты марапаттау рәсімінде белгілі болады.