«Самұрық-Қазынаның» білім беру жобалары: инклюзиядан бастап кәсіптік бағдарлауға дейін

2024 жылдан бері қор жалпы білім беретін мектептерде инклюзияны қолдау кабинеттерін ашуда. Бүгінде мұндай кабинеттер Астана қаласының 31 мектебінде, Атырау облысының Құлсары қаласында, сондай-ақ Ақмола облысының бес ауылында ашылды. 2026 жылы жоба Ақтөбе мен Семей қалаларындағы тағы 15 мектепте жүзеге асырылады. ️

2020 жылдан бері қор балаларға кешенді қолдау көрсету жүйесін қалыптастырып, 55 оңалту орталығын ашты. 2026 жылы оңалтудан өткен 91 бала жалпы білім беретін мектептерде оқуын жалғастыра алады. Оңалту балалардың қажетті дағдыларын дамытуға көмектесіп, олардың әлеуметтенуі мен білім алуына жағдай жасайды.

Тағы бір бағыт – балалар үйлерінің тәрбиеленушілеріне кәсіби тұрғыдан өз бағытын таңдауға қолдау көрсету. «Samruk Umiti» жобасы аясында жасөспірімдерге болашақ мамандығын, олардың қызығушылықтары мен еңбек нарығындағы сұранысты ескере отырып, таңдауға көмектесетін кәсіптік бағдар беру жұмыстары жүргізіледі. Жобаның 39 қатысушысы жұмысшы мамандықтарды таңдап, техникалық колледждерде білім алып жатыр.

Тағы 40 бала тегін кәсіптік бағдарлаудан өтіп, биылғы оқу жылында колледждерге түсуді жоспарлап отыр.

Сонымен қатар, 2027 жылы Астана қаласында Неміс шетел мектебін ашу жоспарланған. Мектепте қос тілді білім беру, STEM бағыттарын дамыту және мәдениетаралық диалогты дамыту көзделген. Сондай-ақ, 200 балаға білім гранттарын бөлу жоспарланып отыр.