Самұрық-Қазынаның экономикадағы үлесі ұлғайды

2018 жылдың қорытындысы бойынша "Самұрық-Қазына" ҰӘҚ" АҚ мен қоржындық компаниялар тобының Қазақстан Республикасының экономикасындағы үлесі 2017 жылмен салыстырғанда 1,2 есеге артып, 4 трлн теңгеден астам соманы құрады.

Мәселен, "ҚазМұнайГаз" Ұлттық компаниясының үлесі 2017 жылғы көрсеткішпен салыстырғанда 3,17%-дан 4,69%-ға ұлғайды, "ҚТЖ" ҰК" АҚ үлесі 0,97% -дан 1,11%-ға дейін жетті.

Сонымен қатар, 2017 жылмен салыстырғанда Қор кірісі (ROE) 6,5%-дан 8,0%-ға дейін артып, Темасек Холдинг (Сингапур), Future Fund (Австралия) сынды халықаралық ұлттық әл-ауқат қорларының өсу қарқынына жетті.

Айта кеткен жөн, 2018 жылдың сәуір айында Қазақстан Президенті Нұрсұлтан Назарбаев "Самұрық-Қазына" акционерлік қоғамының 2018-2028 жылдарға арналған жаңа даму стратегиясын және Қорды трансформациялау бағдарламасын бекітті және оның әрі қарай жүзеге асырылуын ерекше бақылауға алуды тапсырды.

Осылайша негізгі қызметтен түскен табыс көлемі 2017 жылмен салыстырғанда 35% артып, 8,5 трлн теңгеден асып жығылды. Таза кіріс 83%-ға ұлғайып, 1,1 трлн теңгеден астам соманы құрады. Қазақстан Республикасының бюджетіне төленген салықтың көлемі 38,8%-ға артты (1 трлн теңгеден астам) деп хабарлайды "Самұрық-Қазына" АҚ баспасөз қызметі.