Самұрық-Қазынаның Қоғамдық кеңесі Екібастұз МАЭС-терінде болды

Екібастұз қаласында Болат Жәмішевтің төрағалық етуімен «Самұрық-Қазына» АҚ Қоғамдық кеңесінің көшпелі отырысы өтті.

Кеңес мүшелері Екібастұз МАЭС-1 мен МАЭС-2 және «Богатырь Көмір» өндірістік объектілерінде болды.

Бұдан әрі Қоғамдық кеңестің отырысы өтіп, «Самұрық-Энерго» АҚ-ның 2023 жылғы қызметі туралы есептер тыңдалды және 2024 жылға арналған жоспарлар талқыланды.

Атап айтқанда, компанияның өндірістік және қаржылық нәтижелері, инвестициялық жобалар бойынша жұмыстардың қорытындылары, ел экономикасына қосқан үлесі және әлеуметтік жобаларды іске асыру барысы қаралды.

Бұл ретте, Қор портфелінің қомақты үлесін энергетика саласындағы жобалар құрайды.

«Бүгінде Қазақстанның қуаты 16 ГВт. Болашақта іске асырылып жатқан жобалар есебінен «Самұрық-Қазына» АҚ тағы 12 ГВт қуат қосуды жоспарлап отыр. Осылайша, генерация екі есеге ұлғаятын болады, бұл ең жоғары тұтыну кезеңдерінде энергиямен жабдықтаудың тұрақтылығы мәселесін шешуге мүмкіндік береді. Қазір Қазақстанның электр энергетикасы «ренессансты» бастан кешуде, - деп атап өтті «Самұрық-Қазына» АҚ Стратегия және активтерді басқару жөніндегі басқарушы директоры Ернат Бердіғұлов.

«Самұрық-Энерго» АҚ еншілес ұйымдарының электр энергиясын жиынтық өндіруі 2023 жылы 35,3 млрд кВтсағ немесе Қазақстан бойынша жалпы электр энергиясын өндірудің шамамен 31%-ын құрады.

2024 жылы электр энергиясын өндіру көлемін 39,2 млрд кВтсағ дейін арттыру жоспарлануда, деп атап өтті «Самұрық-Энерго» АҚ басшысы Қайрат Мақсұтов.

Егер 2023 жылы 83 негізгі жабдыққа жөндеу жүргізілсе, 2024 жылы 116 жабдыққа жөндеу жүргізілетін болады. Қоғамдық кеңес мүшелері спикерлерге өздерін қызықтырған сұрақтарын қойып, оларға толық жауаптар алды.