Семей теміржолында инфрақұрылымды дамыту көзделіп отыр

Семей жүк тасымалы бөлімшесі бойынша осы жылға жоспарланған басымды міндеттің бірі желі бойына күрделі жөндеу жүргізу болып отыр.  

– Биылғы жылы бірқатар маңызды жобаларды жүзеге асыруды межелеп отырмыз. Өңірімізге өте үлкен инвестициялар тартылмақ. Бірінші кезекте инфрақұрылымды дамыту көзделіп отыр. Соның ішінде ағымдағы жылы жалпы көлемі 85 шақырым болатын телім бойына күрделі жөндеу жүргізілмек. Мұндай жайт өңірімізде бұрын-соңды орын алып көрмеген. Сонымен қатар маңызды шаралар қатарында осыған дейін айтылып жүрген маңызды жоба, еліміз бойынша үшінші шекаралық теміржол телімі Аягөз-Бақты желісі салынбақ. Мемлекет басшысының өзі бұл жобаға аса мән беріп, назарға алып отыр, – дейді бұл орайда Семей ЖТ бөлімшесінің басшысы Владимир Бабиченко.  

Қазіргі таңда семейлік теміржолшылар өз жерлерінде жүргізілетін жоба бойынша даярлық шараларын пысықтауда. Бірінші кезекте жаңа телімнің пайдасы, берер игілігі сарапқа түскен болатын. Осы ретте тоқтала кетер жайт, өткен жылы Абай облысының Азия елдерімен Қытай өңірлерімен шекарамаңы саудасының арқасында жалпы тауар айналымы құрылымындағы үлесі іс жүзінде 54,1 пайызды құрапты. Бұл халықаралық валютамен есептегенде 35,9 млн АҚШ доллары деген сөз.  

Семей бүгінде ірі көлік дәлізі саналады және оның мүмкіндіктері жыл сайын артып келеді. Семей ЖТ бөлімшесінде жүк айналымын кеңейту бағытында түрлі шаралар қабылданып жатыр. 2024-2025 жылдарға жоспарланған ұзындығы 270 км болатын Аягөз-Бақты-Тачэн теміржолы өңірдің көлік-транзиттік әлеуетін арттыруға айтарлықтай әсер ететін жоба болғалы тұр.  

Жоба аясында бөлімше станцияларында да бірқатар ауқымды жұмыстар жүргізу көзделуде. Басты себеп индустриалды аймақ резиденттері үшін арнайы қоймалары бар тұйық желілердің құрылысы басталмақ. Аталмыш шаралардың аясында өңірде «құрғақ порт», «логистикалық парк» құрылатын болады. Бұл орайда апта басында Қазақстан Республикасы мен Қытай Халық Республикасының Шыңжаң – Ұйғыр автономиялық ауданы арасындағы шекарамаңы ынтымақтастығының II достық диалогы барысында бұл мәселе кең көлемде талқыланды. Жалпы, аталмыш форум қорытындысы бойынша 16 құжатқа қол қойылған болатын. Демек, екі ел арасындағы әріптестіктің жаңа кезеңі семейлік теміржолшылар үшін де үлкен жауапкершілік жүктейді деген сөз.