Шетелдік алпауыт компаниялар отандық өнім қолданбайды

Қазақстан Президенті Қасым-Жомарт Тоқаев Атырау облысында сапарында ТШО, NCOC және КПО сияқты ірі мұнай-газ операторлары қазақстандық тауарлар мен жұмыстарды және қызметтерді аз сатып алатынын сын тезіне салды. Оның айтуынша, "Теңізшевройл", "North Caspian Operating Company", "Қарашығанақ Петролиум Оперейтинг" тәрізді компаниялардың 2018 жылғы жергілікті тауар өндірушілермен саудасы небары 34 пайызды құраған. Оның үстіне, бұл көрсеткіш, көптеген жылдар бойы алға жылжымауда.

Мәселенің шешімі ретінде Үкіметке Қашаған жобасындағы бастапқы тендерлер көлемін 20 млн долларға дейін жеткізу тапсырылды. Бүгінде болса, қазақстандық шағын және орта бизнестің бұл тарапта қолжетімділігі күрделі екені атап өтілуде.

Осылайша Мемлекет басшысы өңір халқының әл-ауқатын арттыруды қамтамасыз етуге, отандық өндірушілерді дамыту үшін мұнай-газ секторының әлеуетін барынша пайдалануға көңіл бөлді. Қасым-Жомарт Тоқаев Үкіметке үш ірі жоба аясында өнімдерді сатып алу және қызмет көрсету ісіндегі отандық тауарлар мен жергілікті мамандардың үлесін көбейту, шетелдік және отандық жұмысшыларды бірдей еңбекақымен қамтамасыз ету жөнінде жүйелі жұмыс жүргізуге тапсырма берді.

"Азаматтарымыз сапалы білім алып, жалақысы жоғары жұмысқа орналасуы үшін барлық жағдайды жасауымыз керек. Отандық кәсіпкерлерге де айтарым бар. Мемлекеттің және кез-келген компанияның ең басты байлығы адам екенін ұмытпаңыздар. Бастысы – жаңа жұмыс орындарын ашу, жұмысшылардың жалақысын арттыру", – деді ол.

Сонымен қатар, Президент, "Болашақ" мұнай және газ өңдеу зауытына барды.