SK Construction елдің жиһаз жасаушылары үшін тең бәсекелестік ортасын қалыптастырды

Көрме аясында жайлы мектептерді отандық жиһазбен қамтамасыз етуге арналған жиын өтті. Кездесуге жиһаз жасаушылар қауымдастығының президенті Қанат Ибраев, «Атамекен» ҰКП Басқарма төрағасының орынбасары Мұрат Әмрин және «Samruk-Kazyna Construction» АҚ мониторинг тобының жетекшісі Қуат Жылқыбаев қатысты. Қазақстандық бизнес өкілдері шараға қатысушылардың назарын кейбір құрылыс компанияларының жиһаз бойынша келісімшартқа отыру процесін созып жатқанына аударды. Қуат Әубәкірұлы қазіргі уақытта «Жайлы мектеп» ұлттық жобасының бірыңғай дирекциясы аталған істі тездетіп жатқанын жеткізді.  Мердігерлерге жобалық-сметалық құжаттаманың оң қорытындысын алғаннан кейін 30 күн ішінде жиһаз шығарушылармен шартқа отыру бойынша талап қойылған еді. Уақыттың шектеулігіне байланысты SK Construction әр консорциумның басшысымен жеке жұмыс істеп, шаруаға белсенді қатысуды сұрап отыр.

Алайда, бірыңғай дирекция мердігерлерді белгілі бір компаниямен шарт жасасуға міндеттей алмайды. SK Construction бизнес үшін тең бәсекелестік ортасын қалыптастырған болатын. Сондықтан отандық тауар өндірушілер мен «Атамекен» ұлттық кәсіпкерлер палатасы құрылыс компанияларымен өздері тікелей байланыс орнатуы керек.

Кәсіпкерлер Қазақстанның басқа өңірлерінен жиһаз сатып алу мәселесін де көтерді. Бизнесмендер тауар тек жергілікті кәсіпорындардан жеткізілуін талап етуде. Бірақ, мектептерді толық жиһаз жиынтығымен қамту мүмкіндігі облыстардың барлығында бірдей жоқ. Сондықтан мердігерлер көршілес аймақтардың тауарөндірушілерімен келісімшартқа отыруға құқылы.

Бастысы – мектептерді сапалы жиһазбен қамтамасыз ету және импорттық тауардың сатып алынуына жол бермеу.  Бұл ретте мониторингтік топтың жетекшісі Қуат Жылқыбаев барлық қоғам белсенділерін бірігіп, қатаң бақылау жүргізуге шақырды. Қадағалау процесін оқу орындарына жиһаз келген кезде ғана емес, сонымен қатар өндіріс кезеңінде де ұйымдастыру қажет.