Студенттер Жетібай кен орнына экскурсия жасады

Болашақ мұнайшылар кенорнымен танысуды ең алдымен Жетібай кенорнындағы оқу-жаттығу полигонынан бастады. Онда «Жетібаймұнайгаз» өндірістік басқармасының білікті мамандары студенттерге мұнай өндіру мен өңдеудің барлық кезеңдері туралы жіті түсіндіріп, заманауи технологиялардың мұнай өндірудегі мүмкіндіктерін көрсетті.

Полигонда қара алтын өндірісінің қыр-сырына әбден қаныққан студенттер тәжірибе алаңындағы әсерінен айығып үлгермей, «Еңбек даңқы» мұражайына бас сұқты. Жастар Жетібай кенорнының қалыптасуының барлық кезеңдері туралы баяндайтын бірегей экспонаттарды, құжаттар мен мұрағаттық фотосуреттерді көріп, Маңғыстау мұнайының ашылу тарихымен танысты. Мұнай өндірісінің ауыртпалығын еңсере білген азаматтардың жүріп өткен жолына куә болды.

Тағылымды сапардың соңы «Жетібаймұнайгаз» ӨБ геологиялық қызметінің жұмысымен жіті танысумен аяқталды.