Табиғат пен тазалық қорғаны

Оның «Қазақтелекомда» жұмыс істеп жүргеніне 10 жылдан асты. Бастамашыл әрі жұмысы тындырымды қызметкер. Компанияда қызметтерді жарнамалау ісіне жауапты. Ол жарнамалаған қызметтерден түсетін табыс ұдайы артып келеді.

Өз ісіне ұқыптылығымен қатар, Динара нағыз экобелсенді! «Қазақтелеком» үздік әлеуметтік жобаға байқау жариялаған кезде де ол бірден «Таза әлем» бағытын таңдаған. Ол байқауға жай ғана қатысып қойған жоқ, қағаз жинау, тапсыру және өңдеу жобасымен жүлделі екінші орынды еншіледі.

«Байқаудағы жобам арқылы әріптестерімді табиғатты аялауға шақырғым келді. Кеңседен шығатын қоқыстың тең жартысы — қағаз. Ал оны жасау үшін қыруар ағаш кесіледі, мол су жұмсалады! Егер біз қағаздың орнына электронды құжат қолдансақ, беталды принтерден қағаз шығара бермесек, әрбіріміз 20-25 ағаштың кесілуінің алдын алушы едік, әрі энергия ресурстары мен су шығынын да қысқартар едік», — дейді Динара.

Әріптесіміз бос уақытын отбасына арнайды: екі ұлын өзі сияқты табиғаттың қорғаны етіп тәрбиелеп отыр.