Тағдыры Қаражанбаста тоғысқандар

Беркін Отарбаев осыдан 15 жыл бұрын кен орнындағы материалдық-техникалық жабдықтау базасына жүк қабылдаушы болып жұмысқа орналасты. Ұжымға енді қосылған жас маманның аталмыш базада құжаттармен жұмыс істейтін Динара есімді бойжеткенмен әңгімесі жарасып, достық қарым-қатынастың іргетасы қаланады.

«Беркіннің жұмысқа алғаш келген күні есімде. Басшылар жаңа қызметкермен таныстырған сәттен бастап, ол да ұжыммен бірден тіл табыса алды. Өз ісіне жауапты, ұқыпты, орнымен әзілдесе білетін салмақты жігіт көпшіліктің мақтауын алған маманға айналды. Ел мақтаған жігітті қыз жақтаған ғой. Досымның жетістігі үшін шын қуанатынмын», – дейді Динара Джандаева.

Арада 2-3 жыл уақыт өтіп, достар жұмыс бабымен Ақтау қаласындағы орталық кеңсеге ауысты. Сол уақыттан бері арадағы достық махаббатқа ұласып, 2011 жылы Беркін мен Динара шаңырақ көтерді. Қызметте де, отбасында да сыйластықты ту етіп, адамгершілікті алдыңғы қатарға қойған жұп, 1 ұл мен 2 қыз тәрбиелеп отырған бақытты ата-ана.

«Біз жұмыста әріптес, ал үйде ерлі-зайыптымыз. Бір компанияда қызмет ететіндіктен бір-бірімізді жақсы түсінеміз. Жұмыс барысында жауапкершілікті талап ететін маман болсам, үйде отбасына қамқорлықпен қарайтын әкемін деп айта аламын. Келіншегіңмен бір салада, бір мекемеде жұмыс істеудің жағымды жақтары жетерлік», – деп сырымен бөлісті Беркін Отарбаев.

Қазір отағасы сатып алу бөлімінің басшысы қызметін атқарса, Динара Джандаева жоспарлау бөлімінің инженері болып жұмыс істейді. Биыл үйленгеніне 10 жыл толатын отбасы қос тағдырдың Қаражанбаста тоғысқанына дән риза.

«Қаражанбасмұнай» АҚ баспасөз қызметі ұсынды