Хотите получать уведомления в браузере о последних изменениях на сайте SKNEWS.kz
Қаражанбас талай еңбек адамдары бір толқында тоғысқан ірі өндіріс ошағы. Олардың әрқайсысы Маңғыстау мұнайын игеруге сүбелі үлес қосып, саланың майталман маманына айналуды мақсат еткен. Адал еңбек пен адами құндылықтарды басты ұстанымға айналдырған қаражанбастықтар үкленге құрмет көрсетіп, жастардан ізетін аямайды.
Компанияда қалыптасқан игі дәстүрге сәйкес, пайдалану жабдықтарын икемдеу-жөндеу цехының еңбек ұжымы 6-дәрежелі электргазбен дәнекерлеуші Қанат Күнғараевты құрметті демалысқа шығарып салды. Цех басшылығы зейнет жасына жеткен ардагерге кен орнын дамытуға қосқан үлесі үшін алғыс білдірді. Сондай-ақ әріптестер атынан өмірдің жаңа белесіне сәттілік тілеп, шапан жауып, естелік сыйлықтар табыс етті.
Қанат Күнғараев 22 жылдан бері ПЖИЖЦ-да табан аудармай еңбек етіп келеді. Ол жұмысқа кіріскен шақтан бастап жылжымалы дәнекерлеу аппаратын бес саусағындай меңгеріп, күн сайын бірнеше өндірістік объектіде жұмыс істейді. Ұзақ жылғы тәжірибе арқасында білікті маман кез келген қиындықтағы дәнекерлеу жұмыстарын тез әрі сапалы орындауға машықтанған. Кейіпкеріміз жарқын да еселі еңбек жолы арқылы саланы дамытып, қара алтын өндірушілердің қуатты буынын қалыптастыруға өлшеусіз үлес қосты.
«Қызметке құштарлықпен кіріскенде уақыттың қалай тез өткенін байқамай қалады екенсің. Елім үшін еңбек ете жүріп, соңғы вахтама келгенімді де аңғармаппын. Қаражанбас менің үлкен тәжірибе мектебіме айналып, ұжымдастар туысымдай болып кетті. Жасымды, өзімді сыйлап, көрсетіп жатқан құрметіне шексіз алғысымды білдіремін», – деді ол.
Енді Қанат Күнғараев үшін ғибратты ғұмыр кітабының жаңа парағы ашылады. Десек те, алпыстың асқарынан асқан адал еңбек иесі ұйымшыл ұжымы туралы үнемі мақтанышпен айтып отыратынын жеткізді. Әріптестерінің ыстық ықыласына риза болған ардагер, ізбасарларына өсиетпен өрілген ақ батасын берді.