Теміржолшылар су тасқынынан зардап шеккендерге көмектесуді жалғастыруда

23 мыңға жуық теміржолшы су тасқыны салдарымен күресуге жұмылдырылды. Қостанайлық теміржолшылар құм салынған қаптардан көпірлерді нығайтты. Атырау теміржолшылары 5 мың қап құм дайындау жұмыстарын жүргізді. Орал станциясының қызметкерлері құтқарушыларға ыстық түскі ас ұйымдастырып, гуманитарлық көмек жинап, бөгетті нығайтуда. Мақат станциясы вокзалының қызметкерлері құтқарушыларға қажетті құрал-жабдықтарды: күректер, қаптар мен қолғаптар берді. Атырау облысының теміржолшылары су басқан аудандардан кетуге мәжбүр болған бірнеше отбасын үйлеріне паналатып отыр. Жас теміржолшылар уақытша орналастыру пункттерінде қажетті көмек көрсетуде.

Елдің кейбір аймақтарында теміржол адамдар мен жүктерді тасымалдау үшін жалғыз көлік болып қала береді. Су басқан станцияларға теміржол арқылы азық-түлік жеткізілуде. «Кедентранссервис» АҚ қызметкерлерінің күшімен Құлсары станциясына 17 вагон гуманитарлық көмек тиеліп, жөнелтілді. Қапшағай станциясынан Шұбар-Құдыққа дейін теміржол арқылы су басқан аудан тұрғындары үшін құтқарушы болған понтондық көпір тасымалданды.

Жолаушылар пойыздары тұрғындарды су басқан аймақтардан шығаруда. Қарағанды облысы бойынша 246 жолаушы, Атырау облысы бойынша 5 793 адам тасымалданды. Темір жол арқылы зардап шеккен өңірлерден балалар сауықтыру орталықтарына жеткізілді.

Бүкіл ел бойынша 292 вагоннан тұратын 45 шаюға қарсы пойыз жұмылдырылған. Олар су тасқынының салдарын жою үшін қажетті құралдармен және материалдармен жабдықталған. 47 өрт сөндіру пойызы толық дайындықта тұр. Арнайы пойыздар 8,7 мың текше метрден астам су айдады. Құлсары станциясына Мақат және Бейнеу станцияларының өрт сөндіру және шаюға қарсы пойыздарының 100 қызметкері кезекшілік етеді.

Теміржолшылар су тасқыны салдарынан зардап шеккен әріптестеріне көмек қолдарын соза білді. Оларға су соруға және үй аумақтарын қорғау үшін үйінді жасауға, тұрғын үйді жалға алуға, азық-түлік себеттерін беруге көмек көрсетілді. Құлсары станциясының эвакуацияланған қызметкерлеріне он күндік азық-түлік қоры ұйымдастырылды.

Сонымен қатар, ҚТЖ су тасқынынан зардап шеккен өңірлерге көмек көрсету үшін екі млрд теңге бөледі.

Темір жолда су тасқынына қарсы іс-шараларды уақтылы жүргізудің арқасында темір жолдарын шайып кетудің және пойыздар қозғалысының тоқтауына жол берілмеді. Барлық өңірлерде көпірлердің құбырларын, дренаждық құдықтарды, су бұру арықтарын және т.б. қардан, мұздан және қоқыстардан 100% тазарту жүргізілді. Жалпы алғанда 3,5 мыңнан астам көпір, 6,3 мыңнан астам құбыр, 2,2 мың км астам кювет және 550,5 км таулы арықтар тазартылды. 25 көпірде тәулік бойы кезекшілік ұйымдастырылып, тасқын суларды жасанды құрылыстар (көпірлер, құбырлар, таулы және су бұру арықтары және т.б.) арқылы өткізу штаттық режимде жүзеге асырылды.

Магистральдық темір желі бойындағы су тасқыны жағдайын бақылау және айналма жолдарды жүзеге асыру бойынша шаралар күшейтіліп, барлық  қауіпті деп болжанып отырған орындарға бақылау жүргізілуде.