10 желтоқсан 2018, 14:54 5748

Тоқтар Әубәкіров теміржолшы жастарды марапаттады (фото, видео)

Қазіргі таңда "Қазақстан темір жолы" компаниясында 52 мың жас қызметкер жұмыс істесе, бұл ондағы еңбек ұжымының 39% құрайды. Тиісті мәлімет «ҚТЖ» ҰК» АҚ ІХ Республикалық жастар форумының қорытындысында айтылды.

Форум қатысушылары алдында сөйлеген сөзінде Басқарма төрағасының корпоративтік мәселелер жөніндегі орынбасары Серік Әбденов жастар саясатын жүзеге асыру үшін жыл сайынғы дәстүрлі іс-шара өткізудің маңызына тоқталды, деп хабарлайды Ұлттық компанияның баспасөз қызметі.

Сондай-ақ құрылтай қатысушылары алдында тұңғыш ғарышкер Тоқтар Әубәкіров те сөз алды. Батыр тұлға талантты да білімді қызметкерлердің көліктік-логистика саласын сәтті дамытуға қосар үлесін атап көрсетті.

Форумда "Менеджмент жобасы" және "Болашақ басқарушылар" байқауларының жеңімпаздарына дипломдар табыс етілді.

Өңірлер деңгейінде 198 жоба ұсынылса, соның ішінен республикалық деңгейде мақұлданған 45 жоба таңдап алынды. Осы жұмыстардың ішінен үш жоба: "Сигналист" датчигі, "ҚТЖ Smart" және "Түйіспесіз жолдардың жағдайын бақылауға арналған бағдарлама" туындыларының иегерлері үздіктер қатарынан табылды.

Жиырма жас маман "Жас кәсіби маман" сыйлығының лауреаты атанды. Форумда сондай-ақ "Жастар көзқарасы", "Есімізде, мақтанамыз, мұрагеріміз" және "Мерейлі жас теміржол отбасы" жеңімпаздары мараптталды.

Форум өткізілген кезеңде екі мыңға тарта адам әртүрлі жобаларға қатысты, нәтижесінде 70 жас қызметкер мансабында өсті.

ІХ Республикалық жастар форумына барлық өңірлік темір жол бөлімшелерінің 300 тарта жас қызметкері қатысты.