Транскаспий бағдарында жүк 2,5 есе артты

Бүгінгі таңда аталған бағдардың көліктік инфрақұрылымы арқылы 6 млн тоннаға жуық, соның ішінде 80 мың ЖФЭ көлемінде жүк тасымалдауға мүмкіндік бар. Оған қоса Ақтау және Құрық теңіз порттары арқылы да жүк тасымалының көлемі артып отыр. Аталған мерзім аралығында Қазақстанның теңіз порттары арқылы Әзербайжан бағытына 1,9 млн тонна жүк тасымалданыпты, бұл өткен жылдың сәйкес кезеңіне қарағанда 2,1 есе көп.  

Транскаспий халықаралық көлік бағдары немесе Middle Corridor Қазақстан, Әзербайжан, Грузия аумағы арқылы Қытайдан Еуропаға дейін созылып жатыр, бұл бағдар тауар тасымалдауда тиімді сауда дәлізі ретінде қарастырылады. 

«Ресей мен Белоруссияға қатысты салынған санкциялар көпке дейін созылады. Бұл Солтүстік сауда бағдары әзір ашылмайтынын білдіреді. Соның есебімен Транскаспий бағдарының әлеуеті артады. Оның үстіне сауда дәлізіне Жібек жолын жаңғырту бойынша «Бір белдеу. Бір жол» жаһандық бастамасын жүзеге асыратын тек Қытай тарапынан ғана емес, сонымен қатар Еуропа елдерінен де қызығушылық басым екенін көріп отырмыз», – дейді KPMG Caspian жеткізу тізбегі басқармасының практикалық аға консультанты Тимур Қожахметов.  

Нұрай СӘРСЕНҒАЛИ