Түпкі мақсат - инвестициялық холдингке айналу

"Баршаңызды жер-дүние түлейтін көктем мезгілінің көркем мерекесі - Наурыз мейрамымен шын жүректен құттықтаймын! Жыл сайын бұл мезгіл адамзаттың көңілін жадыратып, ойын сергітіп, жүрегін мейірім нұрына толтырып, жаңа мақсаттарға талпынуға шабыт береді. Қазақстанның түкпір-түкпірінде еңбек етіп жүрген "Самұрық-Қазына" қоры компаниялар тобының 319 мыңға жуық қызметкері де Ұлыстың ұлы күнін өткенге ризашылық білдіріп, келешекке үмітпен қарсы алады деп сенемін.

Өткен жылы Қордың 2018-2028 жылдарға арналған Даму стратегиясы қабылданды. Алдағы он жылда алдымызға қойып отырған мақсаттарға жету үшін біз алдымен компаниялардың табыстылығын арттырып,  олардың портфельдік құрылымын оңтайландырып, кірісті әртараптандырып, корпоративтік басқару үрдістерін жетілдіруіміз керек. Қордың алдында тұрған негізгі міндет – жекешелендіру жоспарына кірген ұлттық компанияларды IPO-ға шығару. Халықаралық биржаға шығу үшін компанияларды жан-жақты дайындықтан өткізу қажет, бұл  - әрқайсымыздың үлесімізді талап ететін ауқымды жұмыс.

Түпкі мақсат – елдің әл-ауқатын арттырып, келер ұрпақтың жарқын болашағын қамтамасыз ететін инвестициялық холдингке айналу.  Сол себепті бізге бизнес-мақсаттар мен әлеуметтік жауапкершілікті қатар алып жүру міндет", - дейді өз лебізінде Ұлттық әл-ауқат қорының жетекшісі.

Толығырақ "SK News" корпоративтік басылымының жаңа нөмірінен оқи аласыздар.