Вагондардың жаңарғанына жолаушылар риза

Біз сенбі күні түскі сағат үште Шымкент вокзалына 20 минут аялдаған пойызды қарсы алып, су жаңа құрамның жолаушыларымен тілдесіп үлгерген едік. «Жақсыны көрмек үшін» деген, бірнеше күннен бері жұрт жабыла мақтап жатқан жаңа вагон- дарды көруге біз де асық болдық. Алдымен «әйелдер вагоны» аталған 7-ші вагонға бардық. Маңғыстаудан Алматыға келе жатқан жолаушы Айман Алпамысова заманауи үлгідегі су жаңа вагондарға бір риза болса, тек әйелдерден құралған вагон шыққанына екі риза екенін жеткізді.

«Мен үнемі осы Маңғыстау-Алматы бағытындағы пойыздың қызметін пайдаланамын. Мұның алдында вагондардың сапасы сын көтермейтін өте нашар болатын. Дәретхананың сасық иісі, купе мен плацкарттардың әбден ескіріп кеткен орындықтары ыңғайсыздық тудыратын. Телефон зарядтап алу, тамақты тоңазытқышқа сақтап қою, микротолқынды пешке тамақ ысытып алу деген мүлдем жоқ еді. Қазір жаңартылған вагонда қажеттінің бәрі бар. Тек қана әйелдерге арналған вагон шықты дегенді естіп, соған билет сатып алдым. Ер адамдарсыз жолаушылап келе жатқанымыз бірден сезіледі, қауіпсіз әрі қысылмай еркін отырасың. Әңгімемізді айтып, шәйімізді ішіп, қалауымызша жа тып-тұрып емін-еркін келеміз», – деп күлді Айман апай.

Ақтау мен Алматы шаһарының арасы үш мың шақырымдай арақашықтықты құрайды. Мұндай ұзақ жолға көлікпен жүру қолайсыз, ал ұшақтың билетін кез келгеннің қалтасы көтермейді. Сондықтан жолаушылар үшін өте тиімді де ыңғайлы көлік – пойыздардың жаңарып, сервистік қызметі артып жатқаны кімге ұнамасын, әрине, жолаушылар дән риза екендерін жасырмады. Пойыз басшысының айтуынша, «Жолаушылар тасымалы» АҚ №77/78 «Маңғыстау – Алматы-2» пойызының 90 вагонын жаңартқан. Бұл, әрине, жолаушылар ағы- нының көбейе түсуіне де септігін тигізері даусыз. Шымкент вокзалынан мінген сексен жастағы Мәриям әжей сыңғырлаған су жаңа вагондарды көріп, қатты риза болып, «бәрекелді, мынандай пойызда жол жүрудің өзі ғанибет қой, теміржолшы балаларыма алғысымды жеткізіңдер» деді.

«Ақтаудан 21 қазанда кешкі онда жолға шықтық. Құрамда 12 вагон, 7 плацкарт, 5 купе бар. Вагондар керек-жарақ құралдармен толық жабдықталған. Жолдың ұзақтығына қарамай жолаушылар көңілді келеді,бұл бір ерекше сапар болды», – дейді пойыз бастығы Ерлан Нұралыұлы.

Жансая Сыдықбай

Дереккөз: «Қазақстан теміржолшысы»