«Үздік маман-2023» байқауының тәжірибе кезеңі

Қаражанбаста теория мен тәжірибені тең меңгерген кәсіби білікті мұнайшыларды анықтайтын «Үздік маман-2023» сайысының екінші кезеңі басталды. І вахта бойынша тест тапсырмаларын ойдағыдай орындаған жүзден астам қатысушы 23 аталым бойынша өз шеберлігін дәлелдеу мақсатында практикалық тапсырмаларға кірісті.

Екінші кезең кен орны аумағындағы бірнеше өндірістік алаңда бір мезетте өтіп жатыр. Мұнда тәжірибе тапсырмаларына қажетті барлық құрал-жабдықтар мен арнайы техникалар бар. Әр аталым қатысушыларына тапсырма көлеміне байланысты арнайы уақыт белгіленген. «Үздік мамандар» жылдар бойы жиған білімін пайдаланып, жұмысты тез әрі тиянақты орындауға барын салуда.

«Бұл өз ісінің нағыз үздіктерін анықтайтын шешуші кезең. Сондықтан тапсырма кезінде алгоритмді сақтай отырып, барлығын сапалы орындау керек. Жыл сайын сайыс тартысты өтіп келеді. Бұл арқылы біз кәсіби шыңдаламыз»,– деді қатысушылар.

Білікті мамандардан құралған комиссия мүшелері сайыскерлердің тапсырманы орындау шеберлігін жіті бақылады. Олар ең алдымен қауіпсіздік техникасын сақтай отырып, жұмыстың кәсіби деңгейде орындалуына ерекше мән берді. Қатысушылар да артылған үмітті абыроймен ақтады.

Тәжірибе кезеңі ІІ вахта үздіктері арасында да өткізіледі. Ал жалпы қорытынды екі ауысым жұмысшылары тапсырмаларын толық орындап болғаннан кейін анықталады.