17 қалада — 428 станция

«Қазақтелеком» LoRa желісін тарту жобасын 2017 жылы қолға алған болатын. Қазір еліміздің 17 қаласындағы станциялар саны 428-ге жетті.

LoRa — шағын дерек топтамаларын алыс қашықтыққа жіберетін сымсыз технология. Ол «Ақылды үй» және «Ақылды қала» жобаларына қолданылады.

«Қазақтелеком» мүмкіндігінше көбірек қалаларды IoT және M2M қолданатын қызметтермен қамтуды жоспарлап отыр. Олар:

• Ақылды ТКШ — есептеуіштің көрсеткішін қашықтан бақылау және жазып алу, ресурс тұтыну деңгейін ашық етіп, керек кезде жылдам әрекет ету мүмкіндігін береді.
• Ақылды жарық — қала көшелеріндегі әрбір жарықшамды бақылайды: жарық деңгейін ауа райына, күн мезгіліне қарай ыңғайлап отырады.
• Ақылды люк — жаяу жүргіншілердің жарақат алуына жол бермейді, құдықтағы су деңгейін қадағалап отырады.
• Ақылды қоқыс шығарғыш — қоқыс жәшіктерінің толғанын бақылап, арнаулы техникаға бағыт-бағдар беріп отырады.

Құрылғылардан алынған ақпарат Павлодардағы бірыңғай дерек өңдеу орталығына жіберіледі. Айтпақшы, түрлі құрылғылардың ақпаратын жіберу, өңдеу, сақтау қызметі сапалы болуы үшін компания дерек өңдеуге арналған «Network Server» платформасының функционалын айтарлықтай кеңейтті. Соның арқасында қолданушы интерфейсі жақсарып, клиенттердің M2M құрылғысының жұмысын талдау мүмкіндігі арта түсті.