#Abai175 - дүбірлі тойға ұшып бару жеңілдейді

Әуепаркін үшінші 180 орындық Airbus A320 әуелайнерімен толықтырған FlyArystan қазақстандық лоукостері Семейден Нұр-Сұлтанға және де кері бағытта бірінші сапарын орындады. Семейге небары 1 сағаттық сапар 5999 теңгеден басталады, бұл баға бүгінгі күнгі нарықтық бағадан 58% төмен екенін атап кеткен жөн деп сендіреді әуетасымалдаушы.

Бірінші рейстің құрметті жолаушылары – 72 жасар Ғайникамал Қамзабековна мен 70 жасар Қазима Көшембайқызы атты апалар қонған бетте қызыл бауды кесіп, өз баталарын берді.

Олармен қатар жерлестерін Семей қаласының әкімі Ермак Сәлімов те құттықтады. Қала басшылығының сөзінше, лоукостердің пайда болуы Семей әуежайының дамуына септігін тигізумен қатар, келер жылы Абайдың 175 жылдық мерейтойына туристтердің санын арттыруға көмектеседі.

"Біз үшінші бортымызды қабылдағаннан кейін, Тараз, Шымкент және Павлодардан кейін Семейге сапар орындағанымыз туралы қуана хабарлаймыз. Бұдан былай ШҚО-ның екінші қаласына тез әрі жайлы қатынаумен қатар, жолаушыларға өте тиімді бағаларды ұсынамыз. Семейден Нұр-Сұлтанға әуетасымал келешекте ұсынылатын рейстердің бірі болып, келешекте олардың саны артады деген сенімдеміз", - дейді FlyArystan сату және маркетинг бөлімінің директоры Жанар Жайлауова.

Үстіміздегі жыл соңына дейін лоукостер флотына тағы бір әуе кемесі қосылып, 2020 жылдың соңына дейін әуе паркі 10 ұшаққа дейін көбеймек. Осылайша рейстер мен бағыттар саны 5 еселенеді деп жоспарлануда.