Әуе тәртібін сақтауға көмектескен жолаушылар марапатталды

Оқиға 24 қыркүйек күні болған еді. «Алматы – Ақтау» бағытындағы FlyArystan КС 7175 рейсі кезінде А. есімді азамат әуеде ұшу тәртібін бұзады. Бортсеріктердің ескертуіне қарамастан, дөрекі сөйлеп, жолаушылар мен экипажға күш агрессия танытқан жолаушы бетперде тағып, орнына отырудан да бас тартады. Ол аздай, билеті «Алматы – Ақтау» бағытында болғанына қарамастан, Шымкентке бару керектігін айтып, ұшақ есігін ашуға әрекет жасайды.

Жолаушылардың тәртіпке бағынбауының алдын алу және жолын кесу нұсқаулығына сәйкес, бортсеріктер арнайы құралмен азаматтың қимыл-қозғалысын шектейді. Алайда, ол босанып кетіп, бортсерікті қылғындыруға әрекет жасайды. Осы уақытта әуесқой спортшы екі жолаушы бортсерікке көмекке келіп, әуе тәртібін бұзушының қимылын шектеп, сапар бойы оны бақылауға жәрдем береді. Ал ұшақ қонғаннан кейін бұзақы полиция қолына тапсырылған.

Air Astana баспасөз қызметінің хабарлауынша, жыл сайын ұшақ бортында ұшақта тәртіп бұзудың 400-ге жуық оқиғасы тіркеледі. Олардың 20-25-інде физикалық күш қолдану орын алады. Полиция қолына табысталған әрбір тәртіп бұзушы жолаушыға айыппұл салынады.