Атырау мұнай өңдеу зауытында арнайы Орталық ашылды

Атырау мұнай өңдеу зауытында (АМӨЗ) "Jeti Qazyna" жобасы аясында арнайы киіммен және жеке қорғаныс құралдарымен қамтамасыз етудің бірегей орталығы ашылды. Орталық ашылған күні "АМӨЗ" ЖШС бас директоры Шухрат Данбай арнайы таңбасы бар киімнің бірінші жинағын алды. "ҚазМұнайГаз" ҰК АҚ компаниялар тобы арасында пилоттық жобаны іске асыруға "Самұрық-Қазына "ҰӘҚ" АҚ қолдау білдіріп отыр деп хабарлайды зауыттың қоғаммен байланыс бөлімі.

Енді зауытта арнайы киіммен және жеке қорғаныс құралдарымен қамтамасыз ету үдерісі "бір терезе" жетілдірілген үлгісі бойынша жұмыс істейді. Яғни, егер бұрын қызметкер тапсырыс бойынша қоймада киім алуға, өз мөлшерін күтуге, өз бетінше шақтауға және жууға тура келсе, енді осының барлығы бір жерде істеледі. Қызметкер орталыққа келіп, керегін алады, белгілі бір уақыттан кейін оны талапқа сәйкес жуып, құрғақ тазалауға алып келеді, оған басқа жиынтық беріледі. Орталықта киіп көріп, тігінші өлшемі бойынша тігіп береді. Сонымен қатар, АМӨЗ жұмыскеріне берілген әрбір киім-кешек таңбаланған және мәліметтер базасына енгізілген, яғни оның бүкіл «тарихы» жазылады. Киім-кешек жуылып, үтіктеліп біткеннен соң, қызметкердің ұялы телефонына смс хабарлама келеді, және жұмысшы алып кете алады. Орталық тәулік бойы қызмет ететін болады.

Арнайы киім мен жеке қорғаныс құралдарын беру орталығында сақтауға арналған қоймалар, өлшеуіш және жеке қорғану құралдарын пайдалану бойынша нұсқамадан өтуге болатын бөлме бар.

Орталықтың жұмысын ТМД-ның басқа да елдерінде 150-ге жуық ұқсас жобалар бар Қазақстан-Ресей "Allies Industrial" бірлескен кәсіпорны қамтамасыз етеді. Осы компанияның арқасында АМӨЗ бұрынғы тамақ қоймасының бос тұрған ғимаратына күрделі жөндеу және қайта жоспарлау жүргізді.

"АМӨЗ арнайы киімдері мен жеке қорғаныс құралдары беру орталығы – бұл 100% қазақстандық жоба деп сеніммен айта аламын. Бұл Қазақстанда тиісті қызметтердің толық кешені бар алғашқы мамандандырылған орталық. Біз қызметкерлер үшін олардың жайлы және қауіпсіз еңбегі үшін ең жақсы жағдай жасаудамыз", - деп атап өтті "АМӨЗ" ЖШС Бас директоры Шухрат Данбай.

Естеріңізге сала кетейік, "Jeti Qazyna" жобасы аясында тұрақты жылжымалы стеллаждар мен қорғау жүйесі бар құжаттарды сақтауға арналған жоғары сенімді, жанбайтын бөлмелері бар орталықтандырылған мұрағат құрылуда.