"Ауырмау жолын іздеген жөн". Екпе алған ембіліктердің пікірі

Нұрбол МАХАМБЕТОВ, орталық басқару аппаратының бас бухгалтері:

– Еліміз бойынша вакцинациялау шарасы басталған мезетте – биылғы сәуір айының басында екпені бірінші рет алдым. Сосын араға 21 күн салып екінші рет тағы да алдым. Көңіл-күйім жақсы, жұрт айтып жүрген әлсіздікті, денсаулығымда ешқандай өзгерісті байқамадым.

Әрине, екпеден кейін кейбір адамдарда бас ауырған, дене қызуы көтерілген жағдайлар болғанын естідім. Бұл жерде екпеден кейінгі барлық өзгеріс әркімнің өзінің денсаулығына, иммундық жағдайына байланысты дер едім. Үнемі салауатты өмір салтын ұстанған, спортпен тұрақты айналысқан, дұрыс тамақтанып, денсаулығын әркез назарда ұстап жүрген жандар екпені жақсы көтереді. Екінші рет екпеден кейін қолыма паспортымды берді.

Ауырып, қиналып, ем алудың әр түрлі сатыларынан өткенше, ауырмаудың жолын іздеген абзал ғой. Коронавирус дертімен ауырмаймын деп ешкім де кесіп-пішіп айта алмайды. Екпе алғандар да дертке шалдығуы мүмкін. Тек екпе алмағандарға қарағанда оларда дерт жеңілдеу өтеді. Тіпті, мүлдем ауырмауымыз да мүмкін.

Берік БАЯМИРОВ, «Ембімұнайэнерго»басқармасының бас инженері:

– Әріптестеріммен бірге мен де вакцина алдым. Өзімнің және ағайын-тумам мен әріптестерімнің денсаулығына бей-жай қарай алмаймын. Сол үшін де екпе алдым. Бүгінгі таңда баршамызды алаңдатқан пандемияның салған зардаптарын көріп, естіп, оқып отырмын.

Қанмаша адам ауырды, өмірден өтіп кеткендер де біраз. Көптеген шаңыраққа ауыртпалық салған коронавирустың әлі қаншаға созыларын ешкім білмейді. Тіпті, Дүниежүзілік Денсаулық Сақтау Ұйымының жауапты мамандары бұл індеттің бізбен әлі біраз уақыт бірге болатынын айтып, дабыл қағып жатыр. Демек, сақтануды ешқашан да ұмытпауымыз керек.

Жайбарақаттыққа салынар кезең емес. Айналаңдағы жандардың, тума-туыстарың мен отбасыңның денсаулығы алаңдатса, екпе алуды өзімізден бастауымыз керек. Екпе – вирустан сақтанудың бірден-бір жолы.