Автокөлік қатынасы қиындаса, пойыз бар

Жаңа 2020 жылдың басынан Қазақстанда 70 мың текше метр теміржол қардан тазартылды. Бұл туралы "Қазақстан темір жолы" компаниясы хабарлап отыр.

Жаңажылдық мерекелік күндері Қазақстанның орталық облыстарында тұрақсыз ауа райы орнады. Автотрассалардың жабылуынан жолаушылардың дені теміржол көлігіне ойысты. Күрделі ауа райы жағдайына қарамастан, теміржолшылар пойыздарды үздіксіз өткізу және қауіпсіздігін қамтамасыз ету бойынша барлық шараларды қабылдады.

Осылайша, Ақмола, Қостанай, Шығыс Қазақстан және Ақтөбе облыстарының магистральдық желілеріне теміржолшылар 150 рет жедел шыққан. Бұл ретте қардан тазарту және қар аршу техникаларының барлық түрімен 6800 шақырымнан астам теміржол желісі қардан тазартылған. Инфрақұрылым нысандарын тазарту үшін 7 мыңдай шойынжол еңбеккері жұмылдырылған.

"Теміржол желілерін тазарту жөніндегі жұмыстар тәулік бойғы штаттық тәртіпте жүргізілді. Теміржолшылар магистральдық желілерді қардан барынша тазартуға тырысады. Жол монтерлері мен өзге де теміржол кәсіпорындарының жұмысшылары теміржолда пойыздар қозғалысы кестесінің бұзылуына жол бермеді", - дейді "ҚТЖ" ҰК" АҚ жол және құрылымдар департаментінің бас менеджері Дәурен Қабас.