Бозымбаев "Жеңіске" қол жеткізді

Шара барысында Энергетика министрлігі, ҚМГ мен ЛУКОЙЛ ("ЛУКОЙЛ Қазақстан Апстрим" ЖШС) арасында Каспий теңізінің қазақстандық секторындағы "Жеңіс" теңіз телімін бірлесе игеру шеңберінде көмірсутектерді барлау мен өндіруге құқық беру бойынша тікелей келіссөздер хаттамасына, сондай-ақ өзара түсіністік туралы бірлескен ынтымақтастық меморандумына қол қойылды.

Келіссөздер қорытындысы бойынша қазақстандық тараптың пайдасына қол қою бонусын (жер қойнауын пайдаланушының келісімшарт аумағында жер қойнауын пайдалану құқығын иелену үшін біржолғы тіркелген төлемі – ҚР Салық кодексі) және кадрлар құрамында (50% - басшылар, 80% - құрылымдық бөлімшелердің басшылары, 90% - орта буын мамандары, 100% - білікті жұмысшылар), сондай-ақ жұмыстар мен қызметтерде кемінде 50% жергілікті қамту үлесі бойынша жер қойнауын пайдаланушы міндеттемелері туралы уағдаластыққа қол жеткізілді. 

Ынтымақтастықтың келесі кезеңі "Жеңіс" телімінде көмірсутектер шикізатын барлау мен өндіруге келісімшарт жасау болмақ. 

Естеріңізге салайық, 2018 жылдың 5 маусымында ҚМГ мен ЛУКОЙЛ арасында "Жеңіс" жобасы бойынша қағидаттар туралы келісімге қол қойылған болатын. Ол келісімге сәйкес бірлесе барлаудың негізгі шарттары бекітілді. 2018 жылдың 30 қарашасында Бірлесе қызмет ету туралы келісімге және Қаржыландыру туралы келісімге қол қойылды. 

ҚМГ мен ЛУКОЙЛ стратегиялық серіктестер болып табылады және ұзақ жылдар бойы бірқатар бірлескен жобаларды іске асырып келеді деп хабарлайды "ҚМГ" ҰК" АҚ баспасөз қызметі.